विदेशं लिहां वःपिंपाखें महानगरपालिका सतर्क प्रमुख प्रशासकीय अधिकृतयात तकं हाजिर मयाकू
लहनान्युज | चौलाथ्व एकादशी ११४०, चैत्र २२
थौंकन्हय् देशय् गुलि नं कोरोना भाइरस संक्रमित ल्वगित खने दयाच्वंगु खः उपिं अप्वः धइथें विदेशं लिहां वःपिं लानाच्वंगु कारणं विदेशं लिहां वःपिं नेपाःमितय् स्वास्थ्ययात कयाः येँ महानगरपालिका चिन्तित व संवेदनशील जूगु खँ सीदुगु दु ।
विदेशं लिहां वःपिं नेपाःमित यदि सतर्क व सचेत मजुल धाःसा थुकिं दकलय् न्हापां उमि थः हे छेँजःया ज्यानयात खतराय् लाकीगु व वयां लिपा जःलाखःलायात नं प्रभावित याइगु जूगुलिं
महानगरपालिका चिन्तित जूगु खँ धाःगु दु ।
विदेशं वःपिं व अझ विशेष यानाः भारतं लिहां वःपिं नेपाःमि नागरिकत १४ न्हु तक क्वारेन्टाइनय् च्वनेमाःगु नियमया पालना मयासे पिहां वनेगु, पासापिं नापलायेगु व चाःहिउ जुइगु थेंज्याःगु ज्याखँ यानाच्वंगु कारणं उपिंपाखें कोरोना संक्रमण गुणात्मक रूपं न्यना वनीगु खतरा अप्वयाच्वंगु दु ।
यदि अज्याःपिं मनूत येँय् दुने नं उकथं हे नियमया पालना मयासे पिने पिहां वयाच्वन धाःसा थुकिं ग्यानापुगु स्थिति पिकाये फइगु खँय् मनपा दुने चिन्ता प्वंकेगु ज्या जुयाच्वंगु खँ सीदुगु दु ।
कामपाया सूत्रं धाः कथं येँ महानगरपालिकाया न्हूम्ह प्रमुख प्रशासकीय अधिकृतया रूपय् एक नारायण अर्याल नियुक्त जुइधुंकूगु दु । तर वय्कः भारतया कोलकाताय् महावाणिज्य दूतया कार्यभार सिधयेकाः नकतिनि लिहां वःम्ह जूगुलिं वय्कःयात समेत मनपाय् हाजिर मयाकुसे तयातःगु दु । विदेशं वःपिं सकलें नेपाःमित १४ न्हु क्वारेन्टाइनय् च्वने माःगु नियम कथं वय्कः आः सेल्फ क्वारेन्टाइनय् च्वनाच्वंगु दु ।
क्वारेन्टाइन अवधि सिधयेकाः जक वय्कःयात मनपाय् हाजिर याकेगु तयारी जुयाच्वंगु खँ नं सूत्रं धाःगु दु ।
थःगु ज्याकू दुने हे थुलि संवेदनशील जूगु महानगरपालिकां मेपिं नं सुं मनू विदेशं लिहां वःगु दुसा १४ न्हु तक सेल्फ क्वारेन्टाइनय् च्वनेत इनाप यानाच्वंगु दु । अथे हे विदेशं लिहां वयाः च्वनाच्वंपिं सुं दुसा उमिगु लगत कायेगु लागिं वडा वडायात निर्देशन नं बियातःगु दु । देय्या थीथी जिल्लाय् थौंकन्हय् विदेशं लिहां वःपिं सुं मनू खन धाःसा स्थानीय मनूत थःहे जागरुक जुयाः उमित १४ न्हु क्वारेन्टाइनय् तयेगु ज्या यानाच्वंगु दु ।
