विदेशी धेबालिसें चिनिया नागरीकत ज्वन
लहनान्यूज | बछलागा द्वितीया ११३७ (मे १३ २०१७)
तःधंगु ल्याखय् अमेरीकी डलर, युरो लिसें थीथी देयया धेबालिसें खुम्ह चाइनीज नागरीकयात चन्द्रागिरिया नागढुंगां ज्वंगु दु ।
येँया नागढुंगाय् सवारी ज्वलं चेकजाँचया झ्वलय् प्रहरीं थीथी विदेशी धेबा यानाः मुक्कं यानाः नेपाली धेबाय् ४,९२,९३,४३०.८० ज्वलिंज्वः लिसें प्रहरीं उमित ज्वंगु खः ।
अमेरीकी डलर, युरोलिसें थीथी देयया धेबा राजस्व छले यानाः अवैध रुपं ल्ह्ययेगु व कारोबार यायेगु याःगु गोप्य सुचंया आधारय् चेकजाँच यायेगु झ्वलय् महानगरीय अपराध महाशाखां खटे जूगु टोलिं इमित ज्वनेत ताःलाःगु खः ।
प्रहरीं ज्वंपिनिगुपाखें ह्यान्डब्याग व सुटकेशय् सुचुकाहःगु अवस्थाय् ३,६६,२५० अमेरीकि डलर, ६८,०५० अष्ट्रेलियन डलर, १,४०० स्वीस फ्य्राङ्क, २,२०० जापानी यान, २९,५०,००० चाइनीज युआन, १८, ८६५ पाउण्ड स्टर्लिङ, ७,२०० हङकङ डलर व नेपाली धेबा ४६,६८० तका बरामद याःगु दु ।
प्रहरीं ज्वंपिंलय् चाइनायापिं छम्ह मिजंम्ह ४४दँया याओ जिनवान व मेपिं न्याम्ह मिस्त ४७दँया ताङ युनछियाङ, ३०दँयाम्ह झेन सुयाङ, ४७दँयाम्ह झाओ जियांगजेन, ५०दँयाम्ह छी छियुन, ४४दँयाम्ह लियु छिआओमेइयात ज्वंगु खः ।
ज्वंपिं खुम्हेसित आवश्यक अनुसन्धानया लागिं राजस्व अनुसन्धान विभाग हरिहरभवन छ्वःगु दु ।
Categorized in अपराध
