विद्यार्थीपिन्त इने धका थःगु कोठाय् सुचुकातःगु राहत जफत यात
लहनान्युज | चौलागा चतुर्दशी ११४०, बैसाख १० बुधवाः
त्रिभुवन विश्वविद्यालयय् च्वनाच्वंपिं विद्यार्थीपिन्त राहत इनेगु यानाच्वना धकाः दावी याना वयाच्वंम्ह तथाकथित विद्यार्थी नेता हेमराज थापाया क्वथां हे राहत सामग्री सुचकातःगु बरामद याःगु दु ।
किपू नगरपालिकाया मेयर रमेश महर्जनंं पत्रकार सम्मेलनपाखे थापाया क्वथां सामान बरामद यानागु जानकारी बियादीगु खः ।
मेयर महर्जनं थापाया क्वथाय् राहतया सामग्री सुचुकातःगु धयागु सुचं वयेवं नगरपालिका, किपूया प्रहरी, स्थानीय जनप्रतिनिधि सहीत छापा मारे यानाः उगु सामान बरामद याःगु खः । वयागु क्वथाय् जाकि २५–२५ किलोया २२ बोरा, ७० लिटर चिकं, २५–२५ केजीया खुब्वरा दाल बरामद याःगु खः ।
थःगु क्वथाय् हे राहत सामग्री सुचुकातःम्ह उम्ह विद्यार्थी छुं न्हि न्ह्यः एभेन्युज टेलिभिजनय् न्ववायेगु झ्वलय् धाःसा थःपिं राहत इनाच्वनागु व किपू नगरपालिकां राहतया निंतिं छुं मबिउगु धकाः द्वपं बिउगु खः ।
किपूया मेयर महर्जनं पत्रकार सम्मेलनय् थःपिंसं विद्यार्थी संगठन, त्रिविया पदाधिकारीपिं लिसे समन्वय यानाः विद्यार्थीपिन्ंत इनेगु निंतिं राहत उपलब्ध याकागु खःसां उम्ह थापां धाःसां किपू नगरपालिका, मेयरया हे अपमान जुइकथं टेलिभिजन न्ववानाजूगु खँ नं धयादीगु दु ।
त्रिवि विद्यार्थीपिंत राहत इनेगु बारे नगरपालिकाय् जुयाच्वंगु सहलहय् नं आकाझाकां थ्यंकःवःम्ह उम्ह थापायात अनयाम्ह हे छम्ह स्थानीयपाखें किपूया बेइज्जत जुइकथं टेलिभिजनय् न्ववाःगु धकाः ब्वः बिउगु खः ।
थापां धाःसा थःत नगरपालिकाय् सःताः मेयरया कार्यकक्षय् तयाः दायेकूगु धकाः टेलिभिजनय् न्ववाः जूगु धासें उकिया नं खण्डन यानादीगु दु ।
वय्कलं नगरपालिकां समन्वय यानाः त्रिविया विद्यार्थीपिन्त नं राहत इनागु दु धका धयादिसे सु सु मनू न राहत काःगु दु धयागु थःपिके रेकर्ड दु धका धयादीगु खः । राहतया निंतिं नगरपालिकां नं ग्वाहालि याःगु जूसां राहत इनेगु ज्या यायेत विद्यार्थी संगठन व त्रिविया पदाधिकारीपिंत हे धयागु, तर उकिया म्यान्युट छगू यायेमफुगु कारणं नगरपालिकायात थुकथं आक्षेप बियाच्वंगु खँ नं वय्कलं स्पष्ट यानादीगु दु ।
