विद्रोहिया कविया लुमन्तिइ बिचाः मुँज्या
लहनान्यूज | पोहेंलाथ्व अष्टमी ११३७ (जनवरी ६ २०१७)
नेपालभाषा साहित्यय् विद्रोही कवि धकाः म्हस्यूम्ह लिसें पूर्व सभासद् बुद्ध सायमि मदुगु थौं १३न्हुया पुण्य तिथिस वयकःयात लुमंकाः येँय् निगू बिचाः मुँज्या जुल ।
छगू बिचाः मुँज्या थीथी नेवाः संघसंस्थात जानाः मंकाः ग्वसाः कथं याःगु खःसा मेगु बिचाः मुँज्या नेपाः राष्ट्रिय पार्टिपाखें याःगु खः ।
नेपालभाषा एकेदमि, च्वसापासा, नेवाः देय् गुथि नेपालमण्डल, नेपाल सम्वत न्हूदँ राष्ट्रिय समारोह समिति, नेपाः राष्ट्रिय पार्टिया मंकाः ग्वसालय् छगू बिचाः मुँज्या जुल । व धुंकाः नेपाः राष्ट्रिय पार्टिपाखें बिस्कं हे मेगु बिचाः मुँज्या नं याःगु खः ।
मंकाः ग्वसालय् जूगु ज्याझ्वलय् नेपालभाषा एकेदमिया चान्सलर चित्तरन्जन नेपाली, च्वसापासापाखें पद्मरत्न तुलाधर, नेवाः देय् गुथि नेपालमण्डलया नायः बिजरराज बज्राचार्य, न्हूदँ राष्ट्रिय समारोह समितिया नायः भीमसेनदास प्रधान, नेपाः राष्ट्रिय पार्टिया नायः सुवर्णकेशरी चित्रकारं बुद्ध सायमिं नेवाः साहित्य ख्यः व नेवाः आन्दोलनय् बियादीगु योगदानया चर्चा यानादीगु खः
।
ज्याझ्वलय् मदुम्ह विद्रोही कवि सायमिया किपाय् स्वांमाः कोखायेकाः श्रद्धान्जलि देछाःगु खः ।
नेपाः पार्टिया नं बिचाः मुँज्या
मदुम्ह विद्राही कविया लुमन्तिइ नेपाः राष्ट्रिय पार्टिं बिस्कं हे बिचाः मुँज्या ज्याझ्वः यात ।
न्हापांगु संविधान सभाय् नेपाः पार्टिपाखें सभासद् जूम्ह कवि सायमियात बिस्कं हे नं ज्याझ्वः यानाः पार्टिं बिचाः हायेकूगु खः ।
ज्याझ्वलय् पार्टिया पाखें न्वकू डा. रमेश श्रेष्ठ, मू छ्यान्जे डा. विजय सैंजुं मदुम्ह सायमिया योगदानया चर्चा यानादिल । लिसें थरुहट तराइ पार्टिया नायः भानुराम थारु, समाजसेवी दिलबहादुर मानन्धर, सांसद रुक्मिणी चौधरी, संघीय समाजवादी फोरम नेपालया नायः राजेन्द्र श्रेष्ठ व जनकवि दुर्गालाल श्रेष्ठं नं नेवाः साहित्यया लिसें आदिवासी जनजातिया पहिचानया आन्दोलनय् कवि सायमिं न्ह्याकादीगु पलाःया बिषयस चर्चा यानादीगु खः ।
ज्याझ्वः पार्टिया का.वा. नायः सुवर्णकेशरी चित्रकारया अध्यक्षताय् जूगु खः ।
पार्टिया पूर्व सभासदया झिंस्वन्हुया पुण्य तिथिया दिं लाकाः पार्र्टिं हे ग्वसाः ग्वःगु ज्याझ्वलय् पार्टिया वर्तमान सांसद लक्ष्मण राजवंशीया उपस्थिती मदु । पार्टिं संसदय् पहिचानया मागय् सः थ्वयेकादीम्ह कवि सायमिया बिचाः मुँज्या न्ह्याकाच्वंगु इलय् पार्टिया सांसद राजवंशी धाःसा सरकारं संसदय् दर्ता याकूगु संविधान संशोधन प्रस्तावया विरोधय् प्रतिपक्षी दलं येँय् याःगु जनशक्ति प्रदर्शन ज्याझ्वलय् ऐक्यवद्धता क्यनेत थ्यनाच्वंगु खः ।
Categorized in राष्ट्रिय
