विनियोजन विधेयक २०७६ यात कयाः सहलह न्ह्यात
लहनान्युज | ने.सं. ११३९ तछलाथ्व नवमि (११ जुन, २०१९), मंगलवाः
प्रतिनिधि सभाय् विनियोजन विधेयक २०७६ अन्तर्गत थीथी मन्त्रालयया नितिं फ्याःगु शीर्षकयात कयाः सहलह शुरु जूगु दु ।
विनियोजन विधेयकया मन्त्रालयगत सहलहया न्हापांगु दिं थौं मंगलवाः युवा तथा खेलकूद शहरी विकास व अर्थ मन्त्रालयया नितिं विनियोजन याःगु धेबायात कयाः सहलह जूगु खः ।
उगु मन्त्रालयया नितिं विनियोजन याःगु बजेटयात कयाः थःथःगु धापू तयेगु झ्वलय् सांसदतसें कासाख्यःयात उपेक्षा याःगु द्वपं ब्यूगु दु । शीर्ष नेताया निर्वाचन क्षेत्रयात अप्वः बजेट फ्याःगु नं उमिसं द्वपं ब्यूगु दु ।
अथे हे बजेटयात व्यवस्थित यानाः विकास यायेगु स्वयां नं लाथेपाथे खर्च यायेकथ विनियोजन याःगु सांसदपिनिगु द्वपं खः ।
कन्हय् वन तथा वातावरण, महिला, बालबालिका तथा ज्येष्ठ नागरिक व कृषि तथा पशुपन्छी मन्त्रालयया नितिं विनियोजन याःगु शीर्षकयात कयाः सहलह जुइ ।
विनियोजन विधेयकलिसें आश्रित राष्ट्र ऋण म्हयेगु विधेयक व ऋण तथा जमानत नीस्वक्वःगु संशोधन विधेयक नं सरकारं वंगु विहिवाः हे मुँज्याय् टेबल यायेधुंकूगु दु ।
म्हिगः सोमवाःनिसें असार २ गतेतक विनियोजन विधेयकयात कयाः सहलह याकेगु व ३ निसें ६ गतेतक सम्बन्धित मन्त्रीं लिसः बीगु ज्याझ्वः संघीय संसद सचिवालयं क्वःछिनातःसां नं नेपाली कांग्रेसया संसदय् पंगः थनेवं म्हिगः सोमवाःया मुँज्या स्थगित जूगु खः ।
प्रतिनिधिसभाया मेगु मुँज्या कन्हय् बुधवाः सुथसिया ११ताः ईया नितिं सःतातःगु दु ।
Categorized in राष्ट्रिय
