विम्बल्डनया उपाधि गार्विनयात
लकसमान | ने.सं. ११३७ दिल्लागा ६, शनिवाः (15 july 2917)
स्पेनया गार्विन मुगुरुजां विम्बल्डनया उपाधि त्याकूगु दु । थौं शनिवाः जूगु कासाय् अमेरिकाया भेनस विलियम्सयात ७–५ व ६–० या तप्यंक सेटं बुकूसें उगु उपाधि त्याकूगु खः । घौछि व झिंन्हय्गू मिनेट तक न्ह्याःगु थुगु कासाया न्हापांगु सेट प्रतिस्पर्धात्मक जूगु खःसा निगूगु सेटय् धाःसा भेनस निरीह सावित जुल ।
२३दँ दुम्ह मुगुरुजाया थ्व निक्वःगु फाइनल कासा खः । वंगु सन् २०१५य् थुगु कासाया फाइनलय् थ्यंगु खःसां नं भेनस विलियम्सया केहेँ मय्जु सेरेना विलियम्सपाखें पराजित जुइवं उपाधि त्याकेगुपाखें बञ्चित जूगु खः ।
उपाधि विजेता मुगुरुजाया थ्व निक्वःगु ग्राण्डस्लाम टेनिस उपाधि खः । थ्व स्वयां न्ह्यः सन् २०१६ य् सेरेना विलियम्सयात बुकाः फ्रेञ्च ओपन टेनिसया उपाधि त्याकूगु खः ।
अथेहे सन् २०००य् ग्राण्डस्लाम उपाधि लण्डनय् हे त्याकूम्ह भेनसया नितिं धाःसा थौंया कासापाखें निराश जूगु दु ।
न्हय्क्वःतक ग्राण्डस्लाम उपाधि त्याकेधुंकूम्ह भेनस च्यादँ लिपा उपाधि त्याकेगु ह्वःताः चूलाःगु खः । तर च्याक्वःखुसी ग्राण्डस्लामया उपाधि बिजेता जुइगुपाखें धाःसा मुगुरुजां निराश यानाबिल ।
