विम्बल्डन ओपन टेनिसया उपाधि जोकोभिकयात
लहनान्यूज | ने.सं. ११३९ दिल्लाथ्व चतुर्दशि (१५ जुलाइ, २०१९), सोमवाः
विम्बलडन टेनिसया मिजंपाखेया उपाधि सर्वियाया नोभाक जोकोभिकं त्याकूगु दु ।
थ्यंमथ्यं ५घौतक न्ह्याःगु उगु धेंधेंबल्लाय् स्वीट्जरल्याण्डया रोजर फेडररयात बुकूसें जोकोभिकं उगु उपाधि त्याकूगु खः । उपिं दथुइ ४घौ व ५७गू मिनेट तक धेंधेंबल्ला जूगु खः । उकी मध्ये न्यागूगु सेट जक थ्यंमथ्यं २घौ न्ह्याःगु खः ।
जोकोभिकं न्हापांगु सेट ७–६या ल्याखं त्याकूगु खःसा निगूगु सेट फेडररं ६–१या ल्याखं त्याकल । व लिपा स्वंगूगु सेट ७–६या ल्याखं जोकोभिकं त्याकूगु खःसा प्यंगूगु सेट फेडररं ६–४या ल्याखं थःगु पक्षय् लाकल । न्यागूगु व अन्तिम सेटय् कासा टाइब्रेकरय् वन । टाइब्रेकरय् जोकोभिकं फेडररयात १३–१२या ल्याखं बुकल ।
थ्व जोकोभिकया न्यागूगु विम्बल्डन उपाधि खः । थुगु उपाधि त्याकेवं वय्कलं ब्योर्न बोर्गलिसेया रेकर्डलिसे बराबरी याःगु दु । जाकोभिकया थ्व १६गूगु ग्राण्डस्लाम उपाधि खः ।
अथे खःसां हलिमय् दकलय् अप्वः २०गू ग्राण्डस्लाम त्याकाः फेडरर शीर्ष स्थानय् लानाच्वंगु दु । फेडररं ८क्वःतक विम्बल्डन, ६क्वः तक अष्ट्रेलियन ओपन, ५क्वःतक अमेरिकन ओपन व १क्वः फ्रेञ्च ओपन त्याकूगु दु ।
Categorized in कासा
