विश्वकप क्रिकेटय् वेष्ट इण्डिजपाखें पाकिस्तान पराजित
लहनान्युज | ने.सं. ११३९ बछलागा द्वादशि (३१ मे, २०१९), शुक्रवाः
क्रिस गेलया अर्धशतकया ग्वाहालिं ईङ्गल्याण्डय् न्ह्यानाच्वंगु आईसीसी विश्वकप क्रिकेटय् वेष्ट इण्डिजं पाकिस्तानयात ७गू विकेटं बुकूगु दु ।
पाकिस्तानं ब्यूगु १०६गू रनया लक्ष्य वेष्ट इण्डिजं १३ फुटि ४गू ओभयरय् ३गू विकेट तंकूसें प्राप्त याःगु खः ।
वेष्ट इण्डिजया क्रिस गेलं ३४गू बलया सामना यासें ३गू छक्का व ६गू चौका थ्वानाः अर्धशतक पूवंकूगु खः । निकोलस पुरन ३४गू व सिमरोन हेट्मेर ७गू रनय् नटआउट जुल । १९गू बलया सामना याःम्ह पुरनं २गू छक्का व ४गू चौका थ्वाःगु खः । पाकिस्तानया नितिं मोहम्मद अमिरं ३गू विकेट काल ।
थ्व स्वयां न्ह्यः नटिङ्घमय् च्वंगु ट्रेण्ट ब्रिज स्टेडियमय् अनुभवी कासामिलिसें कासाख्यलय् कुहां वःगु पाकिस्तान वेष्ट इण्डिजया क्वात्तूगु बलिङया न्ह्यःने ताःईतक च्वने मफुत । वेष्ट इण्डिजं टस त्याकाः फिल्डिङ्ग ल्ययेधुंकाः ब्याटिङ याःगु पाकिस्तान २१गू फुटि ४गू ओभरय् १०५गू रन जक दयेकाः फुक्कं आउट जूगु खः ।
पाकिस्तानयात म्हो रनय् आउट यायेगु नितिं वेष्ट इण्डिजया ओसाने थोमसं २७गू रन बियाः ४गू विकेट काःगु खः । अथे हे जोसाने होल्डरं ४२गू रन बियाः ३गू विकेट काःगु खःसा आन्द्रे रसेलं १गू मेडन तसें ४गू रन बियाः २गू विकेट काःगु खः ।
मदिक्क विकेट तंकेधुंकाः दबाबय् लाःगु पाकिस्तानया नितिं वाहाफ रैज व मोहम्मद अमीरं गूंगुगू विकेटया नितिं २२गू रनया साझेदारी याःगु खःसा फकर जमान व वावर अजामं समान २२गू रन दयेकल । गुगु पाकिस्तानया नितिं दकलय् अप्वः रन खः ।
२क्वः तक उपाधि त्याकेधुंकूगु वेष्ट इण्डिज स्वक्वःखुसिइ उपाधि त्याकेगु तातुनां इङ्गल्याण्ड थ्यंकूगु खः । अथे हे सन् १९९२या विश्वकप ट्रफि त्याकूग्ु पाकिस्तान नं वेष्ट इण्डिजलिसेया उपाधि बराबरी यायेगु लक्षय् दु ।
Categorized in कासा
