विश्वकप छनोटया निगूगु चरणया नितिं प्रारम्भिक पुचः ल्यल
लहना न्यूज | ने.सं. ११३९ दिल्लागा षष्ठि (६ अगष्ट, २०१९), मंगलवाः
विश्वकप फुटबल २०२२या छनोटया निगूगु चरण म्हितीगु नेपाःया फुटबल टिमया प्रारम्भिक पुचः घोषणा जूगु दु । थौं मंगलवाः नेपाःया फुटबल टिमया मू प्रशिक्षक योहान कालिनं ३१म्ह दुजः दुगु पुचःया घोषणा यानादीगु खः ।
सुरुवाती प्रशिक्षणय् ३६म्ह कासामिपिन्त प्रशिक्षणया नितिं सःतूगु खः । प्रशिक्षणपाखें न्याम्ह कासामिपिन्त पुचलं पिने लाकाः मू प्रशिक्षक कालिनं ३१म्ह कासामि दुथ्याःगु प्रारम्भिक चरणया छनोट याःगु एन्फां न्ह्यथंगु दु ।
थ्व हे झ्वलय् कमल श्रेष्ठ, नितिन थापा, सेसेहाङ आङ्दाम्बे, अमित तामाङ व मिक्चेन तामाङ पुचलं पिने लाःगु दु ।। विश्वकप छनोटया निगूगु चरणय् नेपाः समूह ‘बी’ इ लाःगु दु । थुगु पुचलय् नेपाःलिसें कुबेत, चाइनिज ताइपेइ, जोर्डन व अष्ट्रेलिया दु । नेपालं थःगु न्हापांगु कासाय् कुबेतलिसे सेप्टेम्बर ५ तारिखय् म्हिती ।
प्रारम्भिक टिम :
विराज महर्जन, किरण चेम्जोङ, विकेश कुथु, विक्रम लामा, सुजल श्रेष्ठ, नवयुग श्रेष्ठ, विशाल राई, अञ्जन विष्ट, रञ्जित धिमाल, सन्तोष तामाङ, विमल राना, एलन न्यौपाने, अजित भण्डारी, अविषेक रिजाल, रवि सिलवाल, सरोज दाहाल, तेज तामाङ, सुमन अर्याल, देवेन्द्र तामाङ, रवि पासवान, अनन्त तामाङ, सुनिल बल, सुवास गुरुङ, दिनेश राजवंशी, हेमन गुरुङ, विशाल श्रेष्ठ, विमल पाण्डे, त्रिदेव गुरुङ, भरत खवास, विमल घर्तिमगर, रोहित चन्द ।
Categorized in कासा
