विश्वकप ट्वेन्टी ट्वेन्टी क्रिकेट धेंधेंबल्लाया सेमिफाइनल कासात थांैनिसें न्ह्यायेत्यंगु दु ।

युएईया अबु धाबीइ न्हापांगु कासाय् इंग्ल्याण्ड व न्युजिल्याण्ड दथुइ कासा जुइ । इंग्ल्याण्ड थःगु पुचःया त्याकामिया रुपय् सेमिफाइनलय् थ्यंगु खः । उमिसं पुचःया ५ गू मध्ये ४गू कासा त्याकुुगु खःसा छगू कासा बूगु खः ।

पुचः चरणया लिपांगु कासाय दक्षिण अफ्रिकालिसे बुइन्ह्यः इंग्ल्याण्डं अष्ट्रेलिया, वेष्ट इंडीज, श्रीलंका व बंगलादेशयात बुकुगु खः । उखे न्युजिल्याण्ड थःगु पुचःलय् ल्यु त्याकामि जुया सेमिफाइनलय् थ्यंगु खः । तुलनात्मक रुपय् कमजोर नालातःगु उगु पुचःलय् न्युजिल्याण्डं पाकिस्तानलिसे बुइमाबलय् भारत, अफ्गानिस्तान, नामिबिया व स्कटल्याण्डयात बुकुगु खः ।

पुचःया लिपांगु कासाय् जेसन रोय घाःपाः जुइधुंका इंग्ल्याण्ड थौं दबाबय् लाइगु खनेदु । उत्कृष्ट फर्मय् दूम्ह जोस बट्लरलिसें थौं रोयया थासय् जोनी बेयरस्टो ओपनिङ व्याटिङय् वइगु संभावना दु । थुगु कासाया त्याकामिं आइतवाः जुइगु फाइनल कासाय् पाकिस्तान व अष्ट्रेलियामध्ये छगू टोलीलिसे उपाधिया नितिं धेंधेंबल्ला याइ ।

धेंधेंबल्लाया निगूगु सेमिफाइनल कासाय् कन्हय् बहनि पाकिस्तानं अष्ट्रेलियालिसे म्हितिइ ।

Categorized in कासा