२०८० चैत्र १६, शुक्रबार

विश्वकप फुटबल अन्तर्गत छनौट कासाय् नेदरल्याण्ड्स व डेनमार्कं तःधंगु गोल अन्तरं त्यात

ञंलाथ्व द्धितीया ११४१, भाद्र २३ बुधवाः

विश्वकप फुटबल अन्तर्गत युरोपेली पुचःया छनौट कासाय् नेदरल्याण्ड्स व डेनमार्कं तःधंगु गोल अन्तरं कासा त्याकुगु दु ।
 
वंगु चान्हय् जूगु पुचः ‘जि’ या कासाय् नेदरल्याण्ड्सं टर्कीयात ६गू–१गूया गोल अन्तरं बुकुगु दु । नेदरल्याण्ड्सया नितिं मेम्फीस डिपें ह्याट्रिक याःगु खः । थ्व जितलिसें नेदरल्याण्ड्स ६ गू कासां १३गू ल्याः मुना पुचःया शिर्ष थासय् थ्यंगु दु ।
 
उतिग्यंक १३गू ल्याः मुंगु नर्वे निगूगु थासय् दु । वंगु चान्हय् जूगु पुचः ‘ए’ या कासाय् पोर्चुगलं अजरबैजानयात ३गू–०या गोल अन्तरं बुकुबलय् सर्विया व रिपब्लीक अफ आयल्याण्डं १गू–१गू गोलया ज्वलिन्ज्वः कासा म्हितुगु दु ।
 
पुचः ‘डि’ लय् फ्रान्सं फिनल्याण्डयात २गू–०या गोल अन्तरं बुकुबलय् बोस्नियां काजखस्तानलिसे २गू–२गू गोलया ज्वलिन्ज्वः कासा म्हितुगु दु । अथेहे पुचः ‘एफ’ या कासाय् डेनमार्कं इजराइलयात ५गू–०या गोल अन्तरं बुकलसा स्कटल्याण्डं अष्ट्रियायात १गू–०या गोल अन्तरं त्याकुगु दु ।
 
पुचः ‘एच’ य् क्रोएशियां स्लोभेनियायात ३गू–० या गोल अन्तरं व रुसं माल्टायात अले स्लोभाकियां साईप्रसयात २गू–०या गोल अन्तरं बुकुगु दु 
Categorized in कासा