विश्वकप मिसा फुटबल ल्यज्याय् इंग्ल्याण्डं लात्भियायात तःधंगु गोलअन्तरं बुकूगु दु ।

इंग्ल्याण्डं आःतकया हे दकले तःधंगु गोल अन्तरं कासा त्याकूगु दु । वंगु चान्हय् जूगु कासाय् इंग्ल्याण्डं लात्भियायात २०–० गोल याःगु खःे। इंग्ल्याण्डं कासा त्याकूबलय् लौरेन हेम्पं ४गोल याःगु खः ।

इलन ह्वाइट, बेथ मिड व आलेसिया रुसों न ह्याट्रिक याःगु दु । इंग्ल्याण्डया नितिं १०म्ह कासातय्सं गोल याःगु खः । थ्वहे कासापाखें इलन ह्वाइट इंग्लीश मिसा पुचःया नितिं दकले उप्वः गोल याःम्ह कासामि जूगु दु ।

वय्कलं केली स्मीथया ४६गोलया कीर्तिमान त्वाःथलाः ४८गोलया न्हूगु रेकर्ड दयेकूगु दु । विश्वकप मिसा फुटबलया मेमेगु ल्यज्या कासाय् स्पेनं स्कटल्याण्डयात ८–०गोल अन्तरं बुकाः फ्रान्सं वेल्सयात २–०गोल याःगु खः ।

अथेहे रिपब्लीक अफ आयरल्याण्डं जर्जीयायात ११–० गोलं बुकाः स्वीट्जरल्याण्डं लिथुआनियायात ७–०गोल अन्तरं, क्रोएसियां मल्दोभायात ४–० गोल अन्तरं, सर्वियां बुल्गेरियायात ४–१ गोलं अले टर्कीं इजराइलयात ३–२ गोल अन्तरं बुकूगु खः ।

Categorized in कासा