२०८० चैत्र १६, शुक्रबार

विश्व बडिबिल्डिङ च्याम्पियनसिपय् ननिता लियांल्यू

लहनान्यूज सम्वाददाता | थिंलाथ्व पंचमी ११३७ (डिसेम्बर ४ २०१६)

नेवाः म्ह्यायमचा ननिता महर्जन बज्राचार्यं च्याक्वःगु डब्लुबीपीएफ विश्व शारीरिक सुगठन अले स्पोर्ट्स फिजिक च्याम्पियनसिपय् आइतबाः कँयया तक्मा त्याकेत ताःलाःगु दु ।
 
ननिताया डेब्यु अन्तर्राष्ट्रिय धेंधें बल्लाखय् मिसा एथलेटिक फिजिकय् लियांल्यू लानाः कँयया तक्मा त्याकूगु खः । थाइलायन्डया पटाायाय् स्वन्हुतक्क जूगु धेंधें बल्लाःया लिपांगु दिं ननितां फाइनलय् चाइनिज ताइपेईंया सुन सु तिङ व इटालीया एलेसान्ड्रा डा सिल्भायात ल्यूने लाकाः कँयया तक्मा त्याकूगु खः।
 
५ कासामिया ब्वति दुगु उगु धेंधें बल्लाखय् मंगोलियाया गाम्बागा उगल्सेबेग न्हाप अले उज्वेकिस्तानया नुरायेभा येलेना ल्यू लाःगु खः ।
 
नेपाली शारीरिक सुगठनय् नेपाःया मिसा कासामिं तक्मा त्याकूगु थ्व न्हापांगु खुसी खः । 
 
ननिता अन्तर्राष्ट्रिय धेंधें बल्लाखय् ब्वति काःम्ह निम्हम्ह मिसा कासामि खः । संयोगया खँ, अन्तर्राष्ट्रिय धेंधें बल्लाखय् ब्वति काःम्ह न्हापांम्ह नेपाःमि मिसा नं ज्यापु समुदायया निर्मला महर्जन खः ।
 
Categorized in कासा