विश्व स्वास्थ्य संगठनयात आर्थिक ग्वाहालि दिकेगु गलत : बिल गेट्स
लहना न्यूज | ने.सं. ११४० चौलागा अष्टमि (१५ अप्रिल २०२०), बुधवाः
माइक्रोसफ्ट कम्पनीया सह–संस्थापक बिल गेट्सं विश्वव्यापी स्वास्थ्य संकट जुयाच्वंगु इलय् विश्व स्वास्थ्य संगठन (डब्लूएचओ)यात आर्थिक ग्वाहालि दिकेगु क्वःछिना गलत जूगु प्रतिक्रिया बियादीगु दु ।
अमेरिकी राष्ट्रपति डोनाल्ड ट्रम्पं विश्व स्वास्थ्य संगठनयात बिया वयाच्वंगु ग्वाहालि दिकेगु घोषणा यायेवं गेट्सं ट्वीटपाखें उकथं प्रतिक्रिया बियादीगु खः ।
विश्व स्वास्थ्य संगठनयात आर्थिक ग्वाहालि दिकेगु ट्रम्पया घोषणा ग्यानापुस्सेच्वंगु नं गेट्सं प्रतिक्रिया बियादीगु दु ।
विश्व स्वास्थ्य संगठनं कोरोना भाइरस (कोभिड–१९)या संक्रमण पनेगु नितिं न्ह्यथनेबहःगु ज्या यानाच्वंगु न्ह्यथनादिसें मेगु छुं नं संस्थापाखें थुकियात प्रतिस्थापन यायेमफइगु नं गेट्सं धयादिल ।
थौंकन्हय् दकलय् अप्वः विश्व स्वास्थ्य संगठन माःगु नं वय्कलं धयादिल । बिल गेट्स एण्ड मालिण्डा गेट्स फाउण्डेशन विश्व स्वास्थ्य संगठन (डब्लूएचओ)यात आर्थिक ग्वाहालि बियाच्वंगु प्रमुख संस्था खः ।
अथेहे, झ्वलय् संयुक्त राष्ट्र संघया महासचिव एन्टोनियो गुटेरसं नं विश्व स्वास्थ्य संगठनयात आर्थिक ग्वाहालि दिकेगु गलत जूगु धयादिल । आः डब्लूएचओयात आर्थिक ग्वाहालि दिकेगु स्वयां नं अझ अप्वः ग्वाहालि यानाः कोरोना भाइरस विरुद्धया लडाईयात क्वातुकेमाःगु नं महासचिव गुटेरसं धयादिल ।
अमेरिकी राष्ट्रपति ट्रम्पं डब्लूएचओ चीनमुखी व कोरोना भाइरसया संक्रमण पनेत ताःमलाःगु द्वपं बियादिसें ग्वाहालि दिकेगु धयादीगु खः ।
विश्व स्वास्थ्य संगठनयात अमेरिकां दकलय् अप्वः आर्थिक ग्वाहालि बिया वयाच्वंगु दु । थगुने अमेरिकां पीगू करोड डलर ग्वाहालि याःगु खः, गुगु डब्लूएचओया मुक्कं बजेटया १५गू प्रतिशत धेबा खः ।
Categorized in अन्तर्राष्ट्रिय
