वीर अस्पतालय् ३९म्ह स्वास्थ्यकःमि संक्रमित, निन्हु ओपिडी बन्द
लहनान्युज | ञंलाथ्व १५ ११४०,भाद्र १७ बुधवाः
संक्रमण फैलि जुया वःगुलि वीर अस्पताल छगु सूचना जारी यासे अस्पताल ओपीडी सेवा निन्हु बन्द जुइगु जानकारी बिःगु दु ।
अस्पतालय् ११म्ह चिकित्सक नाप ३९म्ह स्वास्थ्यकःमिपिन्त संक्रमित जुगु दु । अन ७५म्ह स्वास्थ्यकःमिपि क्वारेन्टाइनय् च्वना च्वंगु दु ।
कोरोना संक्रमणया कारण जनशक्ति अभाव जुया वःगुलि वीरय् आः प्यःगु वार्ड सञ्चालनय् मदु । ल्याबया खुम्ह कर्मचारीयात कोरोना पोजेटिभ वःगुलि ल्याब सेवा न बन्द जुयाच्वंगु दु ।
सोमवाः न्यूरो व क्यान्सर वार्डया बिरामीपिन्त कोरोना पुष्टि जुगुलि उगु वार्ड न बन्द जुयाच्वंगु दु । फार्मेसीया कर्मचारीपिन्त न संक्रमण खनेदुगुलि उगु सेवा न बन्द जुगु दु । अस्पताल भर्ना जूपि बिरामीपि वासः यायेत पिने हे वने माः ।
आकस्मिक कक्षय् च्वपि स्वम्ह चिकित्सक न संक्रमित जुगुलि उगु आकस्मिक सेवाय् न प्रभावित जुगु दु ।
