व्यवस्थित ढंगं नकि, जिमित आपत्ति मदु : मेयर शाक्य
लहानान्युज | कौलागा तृतिया ११४०,कार्तिक १८ मंगलवाः
येँया रत्नपार्कय् खुल्ला रुपं वंगु छुं न्हि न्ह्यवंनिसें न्ह्यानाच्वंगु निःशुल्क जा नकेगु अभियानं पिनेयापिं मनूतय्त येँ वयाः च्वनेत आकर्षित याइगु खँ स्थानीय मनूतय्सं धाःगु दु । नापं न्हिं निसःम्ह मनूत छथासं च्वनाः जा नइबलय् अनं हे कोरोना भाइरस न्यना वनीगु खतरा नं उतिकं अप्वःगु खँ धयाहःगु दु ।
थ्वहे खँयात ध्यानय् तयाः येँ महानगरपालिकां थ्व निःशुल्क जा नकेगु अभियानयात व्यवस्थित यायेगु लागिं सम्बन्धित ग्वसाः खलःयात इनाप याःगु दु । थौंकन्हय् मनूतय् वये–वने अप्वया वःगु व गाडी नं चले याना हयेधुंकूगु अवस्थाय् रत्नपार्क थेंज्याःगु थासय् न्हिनय् खुल्ला रुपं जा नकेगु ज्यां नगरया शोभा स्यनीगु जक मखु जा नइपिनिगु स्वास्थ्ययात समेत मनिंगु खँय् मनपां चिउताः प्वंकूगु खः ।
उगु ज्यायात व्यवस्थित यायेमाल धकाः थःपिंसं यानागु इनापयात अःखतं थुइकाः ‘महानगरपालिकां निःशुल्क जा नके मबिल’ धकाः हल्ला याना हःगु खँय् धाःसा येँ मनपाया मेयर विद्यासुन्दर शाक्यं आपत्ति प्वंकादीगु दु ।
‘थथे फोहोर व खुल्ला थासय् जा नकेगु छुं हे कथं मिले मजू । थःगु हे निजी थाय् वा पार्टी प्यालेसय् तयाः नकेगु व्यवस्था या धइगु जक महानगरपालिकाया आग्रह खः । नके हे मजिउ धकाः जिमिसं धयागु मदु’ मेयर शाक्यं कनादिल ।
येँ महानगरयात फ्वनाः नइपिं मनूत मदुगु शहर दयेकेगु धकाः दछि न्ह्यः हे थःपिंसं घोषणा यानागु स्मरण यासें मेयर शाक्यं धयादिल, ‘नये मखंपिं सुं दुसा उमित मानव सेवा आश्रमय् तयाः नकेगु धकाः महानगरपालिकां जिम्मा हे कायेधुंकूगु दु । उकिं माल धाःसा जिमिसं अन तयाः नका बी । येँ देय्यात फ्वनाः नइपिनिगु शहर चाहिँ दयेके मजिल ।’
रत्नपार्कय् झ्वःलिं फ्यतुनाः नयाच्वंपिं मनूतय्गु फोटो सामाजिक सञ्जालय् तयाः प्रचार यानाच्वंगु खँय् नं वय्कलं आपत्ति प्वंकादिल । ‘थ्व ला वय्कःपिनिगु आत्मसम्मानय् ठेस लाकेगु ज्या जुल । निःशुल्क नयाच्वंपिं मनूतय्गु फोटो सामाजिक सञ्जालय् तयाः ग्वसाः खलकं छु व्यापार यानाच्वन खः जिं मस्यू, तर थुकिं नयाच्वंपिं नागरिकया आत्मसम्मानय् घाः लाकेगु ज्या धाःसा जूगु दु’ मेयर शाक्यं धयादिल ।
कोरोना महामारी पनेगु लागिं सरकारं स्वला तक लकडाउन याःबलय् उकिं पीडित जूपिं मनूतय्त येँ महानगरपालिकां राहत वितरण यायेगु लिसें थीथी थासय् सार्वजनिक रुपं जा नकेगु व्यवस्था समेत याःगु खः । आः रत्नपार्कय् न्हिंन्हिं जा नकेगु ज्यां पिनें वइपिं मनूतय्त अझ आकर्षित याइगु व देगलय् सतकय् द्यनीपिं मनूतय्गु संख्या अप्वयेकीगु चिन्ता स्थानीय जनतायात जुया वःगु दु ।
थ्व विषयय् थःपिनि धापू स्पष्ट यायेगु लागिं येँ मनपां कन्हय् बुधवाः छगू पत्रकार सम्मेलन समेत यायेत्यंगु खँ नं सीदुगु दु।
Categorized in राष्ट्रिय
