व नेवालं बल्ल काठमाडौं खन !
आर. मानन्धरया छुं कविता
 
छन्हु छक्वः
नेपाःगाःया छम्ह ज्यापुं
बुँ क्वानाच्वंबलय्
गनं रेडियोय् सुनां नं
तंतंचायाः ब्वःबियाच्वंगु ताल—
काठमाडौंले कर्णालीलाई हेरेन 
काठमाडौंले सुदूर पश्चिमलाई देखेन
काठमाडौंले तराइ÷मधेसलाई सुनेन
काठमाडौंले दुर्गमलाई हेप्यो
काठमाडौंले यसो ग¥यो
काठमाडौंले उसो ग¥यो 
 
थौंतक थःत हे काठमाडौं ताय्काच्वंम्ह व
अजू चाल !
वाताहाँ जुल !
वं मनंमनं धाल—
व गुगु काठमाडौं खः ?
गुकिं मेपिन्त हेपे यानाच्वन ?
अथे ला मयाय्माःगु खः !
न्ह्याम्हेस्यां जूसां व याय् मज्यूगु खः ।
 
वं बिचाः याइ—
जिं ला सुयागुं छुं स्यंकागु मदुथें च्वं 
स्यंकेगु बिचाः हे यानागु मदुथें च्वं
ज्यूसा सुयां भिं याय्गु खः ।
तर सुयातं स्यंकेगु, भिंकेगु जिगु हैसियत हे छु दु धकाः ?
 
वयात च्वनी—
गनं रेडियों धाःगु काठमाडौं मेगु जकं खः ला ?
मेथाय् नं गनं मेगु हे काठमाडौं दु ला ?
वं स्यूगु काठमाडौं स्वयां पाःगु काठमाडौं !
 
अले हाकनं छन्हु
वया छेँ–बुँ अधिग्रहण याय्त
ततःग्वःगु डोजरनापं
पुलिस–आर्मीत वल
 
सिमां कुतुवंम्ह व,
बल्ल वया न्ह्यलं चाल—
उखुन्हु रेडियों
गुगुपती काठमाडौंया खँ ल्हाःगु खः ।
 
व बिचरा काठमाडौंया नेवालं
बल्ल काठमाडौं खन !