२०८० चैत्र १५, बिहिबार

शहीदपिन्त अवमूल्यन मयाय्

जुजुमान महर्जन
 
जहाँनिया राणा शासन विरुद्ध देशय् प्रजातन्त्र हय्गु नितिं थःगु ज्यानया आहुति बियादीपिं वीर शहीद पिनिगु लुमन्तिइ दँय्दसं ‘शहीद दिवस’ हना वयाच्वंगु दु । थ्व हे झ्वलय् वंगु विहिवाःनिसें येँ महानगरपालिकां छवाःयंक शहीदपिनिगु लुमन्ती थीथी ज्याझ्वः यासें हनाच्वंगु दु । विशेष यानाः प्यम्ह शहीदपिं शुक्रराज शास्त्री, धर्मभक्त माथेमा, दशरथ चन्द व गंगालाल श्रेष्ठया लुमन्तिइ वय्कःपिन्सं शदाहत प्राप्त याःगु थासय् श्रद्धाञ्जली ज्याझ्वः यासें वय्कःपिनिगु योगदानयात कयाः लुमंकेगु ज्या जुयाच्वंगु दु ।
 
 
शहीद धाय्वं हे देशया नितिं थःगु ज्यान पानाः देश व जनताया हीतया नितिं ज्या याःपिं धइगु कथं काइगु खः । तर थौंकन्हय् छुं नं कथंया तथाकथित आन्दोलन जूसां उगु घटनाय् मदुपिन्त ‘शहीद’ घोषणा याय्त माग यासें हाकनं मेगु आन्दोलन यानाः तथाकथित ‘शहीद’ घोषणा यासें धेबा बीगु चलन जुयाच्वंगु दु । थुकिं यानाः धात्थेंयापिं शहीदपिनिगु तकं अपमान जुयाच्वंगु सकस्यां महसूस याना वयाच्वंगु खँ जुल ।
 
 
सायद शहीद धाय्वं हे गजाःपिं मनूत जुइमाः धइगु खँय् तकं वास्ता मयासे थुगु खँग्वःयात कयाः ‘एलर्जी’ जुइगु अवस्थातकं ब्वलंगु दु । थुकिया हुनिं सच्चा शहीदपिन्त तकं ल्वमंकेगु ज्या बुलुहुँ जुयाच्वंगु दु । थजाःगु अवस्थाय् येँ महानगरपालिकां दँय्दसं थःगु ज्यानया आहुति बियाः २००७ सालय् प्रजातन्त्र हय्गु नितिं योगदान बिया वयाच्वंपिं शहीदपिं शुक्रराज शास्त्री, धर्मभक्त माथेमा, गंगालाल श्रेष्ठ व दशरथ चन्दयात लुमंकेगु ज्या जुयाच्वंगु दु । थ्व तसक बांलाःगु खँ जुल ।
 
 
शहीदपिनिगु लुमन्तिइ सरकारपाखें नं दँय्दसं वय्कःपिनिगु योगदानयात कयाः माघ १६ गते बिदा बिया वयाच्वंगु खः । तर अनावश्यक विदायात क्वपालेगु झ्वलय् थुगु शहीद दिवसय् विया वयाच्वंगु विदायात नं क्वपालेगु ज्या जुल । थुकिं यानाः गनं शहीदपिन्त अवमूल्यन जकं याःगु जक मखुला धइगु नं चर्चा याय्गु याः ।
 
 
खय्त ला दकलय् अप्वः बिदा बीगु देय् मध्ये नेपाः नं छगू खः । बहुधार्मिक, बहुजाति, बहुसाँस्कृतिक देश नेपालय् थनया आदिवासी जनजातिया थीथी नखःचखःलिसें संस्कृतियात कयाः बिदा बीगुलिं नं विदा अप्वः जूगु खः । तर आः वयाः देशय् सघीयता वनेधुंकूगुलिं गन आदिवासीया जातिया बाहुल्यता दुगु खः, अनया महत्वयात थुइकाः उगु प्रदेशय् जक बिदा बीगु याःसा निश्चितकथं बिदा म्हो जुइगु नापं अनया आदिवासी जनजातिपिनिगु संस्कृतियात संरक्षण याय्गु ज्या जुइ ।
 
 
थ्व छगू बांलाःगु अभ्यास खःसा थ्व हे झ्वलय् देशय् प्रजातन्त्र हय्गु नितिं थःगु ज्यान पानादीपिं शहीदपिनिगु लुमन्तिइ दँय्दसं बिया वयाच्वंगु विदायात क्वपालेगु धइगु सायद उलि जायज जुइमखु । थ्व छगू जाति, भाषा, धर्म, वर्गयात जक मखुसें देशया समग्र जनतायात हे हीत जुइकथं याःगु योगदानयात कयाः सकल जनतापिन्सं अले स्वयम् सरकारय् आसीन जुयाच्वंपिन्सं नं लुमंकेमाः, अझ लुमंकेगु जक मखु, वय्कःपिन्सं क्यनादीगु लँपुयात नालाः देशयात विकासया ज्याय् न्ह्यज्याके माःगु आःया आवश्यकता खः ।
 
 
उकिं शहीद दिवसयात कयाः सरकारं याना वयाच्वंगु ज्याखं गनं सच्चा शहीदपिन्त हे अवमूल्यन याय्गु ज्या जक जुयाच्वंगु मदु ला ?