शान्तिघट महाविहार संरक्षण समितिपाखें हना
लहनान्युज | गुंलागा अष्टमी ११३८( सेप्तेम्वर १७ २०१८ )
श्रीघः बहाःयानामं सकसिनं म्हसीकावयाच्वंगु नेपालमण्डलया नांजाःगु बुद्ध विहार श्रीशान्तिघट बज्रधातु महाविहार सर्वसंघपाखें नीस्वनातःगु संरक्षण समितिया निक्वःगु वार्षिक दँमुँज्या जुल ।
यलया टिका भैरब द्यःया थाय् जूगु दँमुँज्याय् शाक्य फाउण्डेशनय ानायः अमीरमान शाक्य व शाक्य महाविहार संघया मू छ्याञ्जे संघरत्न शाक्य विशेष पाहाँ कथं झायादीगु उगु ज्याझ्वलय् श्री शान्तिघट बज्रधातु महाविहार संरक्षण समितिया नायः शुभकाजी शाक्यया सभाध्यक्षताय् जूगु खः ।
ज्याझ्वलय् सर्वसंघ परिवारं दँय् दसं श्रीघलय् गुंला लच्छियंकं तुतः ब्वंपिं मध्ये दकलय् अप्वः न्हितक उपस्थित जूपिन्त नं सुभाय् कथं मतिनाया चिं देछाःगु खःसा सर्वसंघया दुजः विजयरत्न असंबरेया काय्. विशेष शाक्ययात एसइइ परिक्षाय् ताःलागुलिं हनापौ लःल्हागु खः ।
संरक्षण समितिया ल्यू छ्याञ्जे गुलाफ शाक्यं लसकुस यानादीगु उगु छ्याञ्जे पुरण शाक्यं वार्षिक प्रतिवेदन न्ह्यःब्वयादीगु खः । अथेहेतुं संरक्षण समितिया दांभरि कमल शाक्यं आर्थिक प्रतिवेदन न्ह्यब्वयादीगु खः ।
ज्याझ्वलय् विशेष पाहाँ संघरत्न शाक्य, मेम्ह विशेष पाहाँ शाक्य फाउण्डेशनया नायः अमीरमान शाक्यं थः थः गु नुगःखँ तयादिसें भिन्तुना देछानादीगु खः ।
