शान्त पुखुलिइ चागःचा कयेके थें जुल येँय्
बिराजकाजी राजोपाध्याय | बछलागा दशमी ११४०
येँ महानगरपालिकाया मेयर विद्यासुन्दर शाक्यं कोभिड १९ संक्रमणया खँय् थौंया दिनय् येँया अवस्था शान्त पुखुलिइ अप्पां कयेके थें जूगु धयादीगु दु ।
लहना मिडियापाखें नेवाः टिभिइ प्रसारण न्ह्याःगु लहना गतिविधि ज्याझ्वलय् खँ ल्हासें मेयर शाक्यं म्हिगःया दिनतक्क कोभिड १९ या संक्रमणपाखें येँ सुरक्षित दु धायेफयाच्वंगुलिइ आः उगु अवस्था मदुगु धयादिल ।
‘लकडाउनया पूर्ण पालना जूगु खःसा थन येँया वासिन्दां सुरक्षित महसूस यायेफइगु खः, तर थन जिम्मेवार मनूतयसं हे लकडाउनया उल्लंघन यानाः मनूतयत येँय् दुकयाब्यूबलय् येँ जक मखु, यक्व हे थाय् असुरक्षित जुयाबिल’ मेयर शाक्यया धापू खः ।
न्हापा संघीय सरकारया मन्त्रीतयसं हे मनूतयत छेँय् छ्वयाबीगु धासें संघीय सरकारं हे जारी याःगु लकडाउन उल्लंघन याःगुया लिच्वः थौं येँ लिसें स्वनिगलं फयेमाःगु शाक्यं धयादिल ।
‘म्हिगःया दिनय् जिं लगायत सकसिनं नयेमखनी धकाः ग्यायेम्वाः, जिमिसं नके, पिहांवनेम्वाः धयागु हे खः, तर छम्ह निम्ह मन्त्रीतयसं छेँय् छ्वयाबीगु धासें मनूतयत थनं पिछ्वल’ शाक्यं धयादिल । ‘आः पिहांवंपिं हानं धमाधम थन लिहांवल, समस्या ला पिछ्वःबलय् हे न्ह्याःगु खत नि ।’
थन लिपा आर्थिक समस्या फयेम्वाःलेमा धकाः उद्योग न्ह्याकेब्यूगुलिइ नं उद्योगीतयसं मापदण्ड अनुसार ज्या यानामबियाः समस्या जूगु नं शाक्यया दावी खः ।
छुं दिं न्ह्यः तिनि हे उपत्यका नगरपालिका फोरमया जनप्रतिनिधिपिन्सं गृहमन्त्री रामबहादुर थापायात नापलानाः स्वनिगः दुहांवयेगु सीमानाकाय् कडाई यायेत इनाप याःगु खः ।
थनया अर्थतन्त्र चलायमान जुयाच्वनेमा धकाः थन उपलब्ध जनशक्तियात हे छ्यलाः उमित नयेगु, द्यनेगु व्यवस्थालिसें उद्योग संचालन या धाःगुलिइ उद्योगीतयसं पिनं मनू सःतूबलय् नं समस्या जूगु मेयर शाक्यं विश्लेषण यानादिल ।
नियमयात लिनाः व्यक्तिगत स्वार्थ जक मस्वसें समुदायया हित, राष्ट्रिय स्वार्थपाखे बिचाः याःगु जूसा थज्याःगु समस्या मवइगु शाक्यया दावी खः ।
लिसें मेयर शाक्यं लँय् पंया बार तयाः पंगः मथनेत नं सकसितं इनाप यानादिल ।
‘लँय् अत्यावश्यक सेवाय् जुइपिन्त पंगः थनेमज्यू, सर्वसाधारणपाखें लकडाउनया पूर्ण पालना हे आःया छगू जक लँ खः’ मेयर शाक्यया धापू खः । ‘अथे पं तयाः कोरोना पनेफइगु नं मखु, समस्या ज्यनीगु नं मखु ।’
उकथं पं तयाः लँ मपनेत व तयातःगु पंगः चीकाबीत मेयर शाक्यं इनाप यानादिल ।
Categorized in राष्ट्रिय
