श्रद्धेय कुमार काश्यप भन्ते लुमंका सम्मान फया कया
राजु शाक्य
नेवाः पत्रकार राष्ट्रिय दबूपाखें त्रिपिटकाचार्य भिक्षु कुमार काश्यप स्मृति सम्मान फया कायेगु सौभाग्य चूलात । लय्ताइगु ला स्वाभाविक हे जुल । विसं २०५७¬–५८ ताकय् थें च्वं । छन्हु न्हिनय् भन्ते लुंमकाः स्वय्म्भू आनन्दकुटी विहारय् वना । भन्ते भचा म्हंमफु जुयाच्वन । थःके ल्वंमनिगु समस्यां जुयावल धकाः वस्पोलं कनाबिज्यात । भन्तेया अन्तर्वार्ता छगू कायेगु जिगु मनसुवा खः । दे न्यंकं हिंसा ब्वलनाच्वंगु व ई । जिगु हे त्वालय् नं विष्णुमति खुशि सिथय् निक्वः निक्वः बम मुइधुंकूगु ।
महेन्द्ररत्न क्याम्पस जःखः व सोल्टी होटेल ल्यूने नं बम मुइके धुंकूगु । अथे जुया हे जुइ मध्य चान्हय् सैनिक वया तलाशी नं काः वइ च्वन । सञ्चार ख्यलय् ज्याः याना च्वंनाम्ह जुसां थुज्यागु विध्वंसकारी घटना लुमंके बलय् म्ह हे चिकं चिकं मिना वइगु । आः छु जुइगु थें धकाः ग्याः चिकु ब्वलनिगु । थ्व हे व्याकुलतां जुइमाः जित वस्पोल भन्तेया छगू शान्ति सन्देश प्रवाह याये दुसा ज्यू धैगू मतिइ लूल । भन्तेनाप खँ ल्हा ल्हा वना । जिं माक्व टिपोट याना । भन्तेनाप या खँल्हाबल्हायात जिं छपू बाइलाइन स्टोरी दयेकाः । थ्व नितान्त छम्ह व्यक्तित्व नापया अन्तर्वार्ता खः तर राससं पाखें प्रश्नोत्तर शैलीया अन्तर्वार्ता सामान्यतया सम्प्रेषण मजुइगु जुया समाचारया शैलीइ ढाले याये माःगु खः ।
मैत्री, करुणा व अहिंसाया सन्देश नापं सुयां नाप वैरभाव ब्वमलंकेगू नेता व जनतायात अखिल नेपाल भिक्षु महासंघया नायया हैसियतं वस्पोलं याना दिइगु आग्रह बांलाक्क हे सम्प्रेषण जुल । राससया अंग्रेजी डेस्कं नं थुकियात महत्व बिया अनुवाद यानाबिल अले व दि राइजिङ नेपालया दुनेया पृष्ठय् छापे नं जुल । छता याये हे माःगु सान्दर्भिक ज्याः याना धकाः सन्तोष तायेकाः ।
भन्ते आपा धैं थे आनन्दकुुटी विहारय् च्वना बिज्याइगु । लिपा म्हं मफयावसेंलि कौडण्य भन्ते च्वना बिज्यागु भृकुटीमण्डपया बुद्ध विहारय् च्वं बिज्यागु नं लुमं । वस्पोलया ओवाद तक्वः न्यने मखं । तर वस्पोलनाप नाप लाक्वः पत्तिकं सम्भव जुथाय् तक्क चिहाकेक खँल्हाबल्हा चाहीँ याना । वस्पोलया दश पारमिताबारेया स्यःल्लागु सफू पिदना च्वंगु दु तर थःम्हेसां फ्वः चायेक ब्वनागु चाहीँ मदु ।
लिपि गुठीपाखें भन्तेया बारे छगू संस्मरणात्मक सफू पिदंगु नं लुमं ।
बुद्ध जयन्तीया उपलक्ष्यय् विद्यालयस्तरया बौद्ध हाजिरी जवाफ प्रतियोगिताय् थः ब्वनागु विद्यालय परोपकार माविपाखें ब्वति कायेगु जुसेंलि उगु ई या सहायक प्रधानाध्यापक शकुन्तला प्रधानं ब्वति काइपिं जिपिं स्वःम्हेसितं भन्ते च्वना बिज्याइगु आनन्दकुटी विहारय् ब्वना यंकूगु खः जित लुमंसे वः । भन्ते नापं न्हापांगु साक्षात्कार जूगु विसं २०३८ पाखें जुइमाः । उबले निसें भन्तेयात जिं म्हसिइकाः । श्रद्धेय भन्तेयात जिं थुकथं हे स्मरण याना । जिं परियत्तिया छम्ह विद्यार्थी नं खः ।
युवा बौद्ध समूहया स्थापनाकालं निसें आवद्ध जुया च्वना । खास याना धर्म निरपेक्षताया आन्दोलन न्ह्याःबले विसं २०४७ पाखें तन्हु मछि प्लेकार्ड दयेकागु व लाखौंया जुलुस पिदंगु दिं न्यूरोडय् गाडीई च्वना माइक नारा थ्वयेकाःगु लुमंसे वः । २०४६ सालया आन्दोलन क्वचाला कृष्ण प्रसाद भट्टराई प्रधानमन्त्री जुइगु जुल । अबले ‘सन्तले सिंहासन पाए’ धकाः विमर्शं साप्ताहिकं छगू अन्तर्वार्ता पिकात ।
आः नेपाः धर्म निरपेक्ष जुइ कि हिन्दु राष्ट्र जुइ धैगू न्ह्यःसया लिसलय् नेता भट्टराई नं हिन्दू राष्ट्र हे जुइ धकाः लिसः बियादिल । नेपाली काँग्रेसया ध्वाय्लय् दुगु प्यंगमध्ये छगः नगूया अर्थ धार्मिक स्वतन्त्रता खः । थुकिया अवमूल्यन यात धकाः व इलय् नं छम्ह पासा ब्वना किपूलिइ च्वना बिज्याम्ह भिक्षु सुदर्शनया अन्तर्वार्ता काः वनागु खः, अले नयाँ नेपाल दैनिकय् समाचारया रुपय् छापे यानागु खः । क्रफ्यूया ग्याःचिकु बीचं किपूलिइ थ्यंकागु नं लुमसें वः ।
दबूया खुक्वःगु तःमुज्याया झ्वलय् आदरणीय भन्तेया हे नामं नीस्वना तःगु सम्मान काये खन । सम्मानित छम्ह साहित्यिक व्यक्तित्व खः सा मेम्ह फोटो पत्रकार हे खः । मेम्ह छम्ह मोफसलं नेपाल टेलिभिजनया नापं बीबीसीया लागि ज्याः याइम्ह पत्रकार खः । वस्पोलपि फुक्क हे सम्मानया लागि सत्पात्र खः । सम्मानया छनोट समितिया च्वंनादिउपिं महानुभावपिं न्ह्यःने कृतज्ञता या नापं आभार व्यक्त याना च्वना ।
प्रतिकूल मौसमं जुइमाः स्वनिगः पिनें थुगुसी सहभागिता म्हो जूगु ताल । उत्साह नं उलि मखना । पत्रकार कल्याण कोष नीस्वंनेगुया लागि उदार हृदय नं ग्वाहाली यानादिइपि आपा खनाः । मन लसतां भय्बिल । फोटो पत्रकार आशाकाजी महर्जनयात नं ग्वाहाली लः ल्हायेगु सराहनीय ज्याः जुल । दे दुने जक मखु परदेशय् च्वंपिनि पाखें नं सञ्चारकःमितये मनोबल थःकायेगु ज्याः जुल । विधान संशोधनय् छझाः बहस जुसेलिं सुझाव यात नं कःघाना यंकेगु समझदारी नापं बन्द सत्र क्वचाल । मोफसल झाःपिं पासापिं नापं नं दुविस्ता व्याकेगु व्हताः चूलात । मुँज्याः ताःलाकेत समय व श्रम बिया दिइपिं फुक्कसितं सभाय् देछानाच्वना ।
