श्रीलङ्कायापाखें अफगानिस्तान पराजित
लहनान्युज | ने.सं. ११३९ तछलाथ्व द्वितिया (५ जुन, २०१९)
विश्वकप क्रिकेटमा श्रीलंकां अफगानिस्तानया बुकल । कार्डिफय् च्वंगु सोफिया गार्डेनय् वंगु चान्हय् जूगु कासाय् श्रीलङ्कां अफगानिस्तानयात ३४गू रनं बुकूगु दु ।
वा वःगुलिं ४१गू ओभरय् कासा म्हितकूगु खः । १८७गू रनया सामान्य ह्याथ्याःयात अफगानिस्तानं ३२.४गू ओभरय् फुक्कं विकेट तंकूसें मुक्कं १५२गू रन जक दयेकेफूगु खः । अफगानिस्तानया नितिं नजिबउल्लाह जादरानं ४३गू व हजरतउल्लाह शाहिदीं ३०गू रन दयेकूगु खः ।
अफगानिस्तानयात म्हो रनय् सीमित यायेगु झ्वलय् श्रीलङ्काया नुवान प्रदीपं ३१गू रन बियाः प्यंगू विकेट काःगु खः । अथे हे लासिथ मालिंगां स्वंगू विकेट काल ।
थःगु वन–डे क्यारियरय् हे उत्कृष्ट ब्वज्या याःम्ह प्रदीप ‘म्यान अफ द म्याच’ जुल ।
थ्व स्वयां न्ह्यः टस बुनाः न्हापां ब्याटिङ याःगु श्रीलङ्कां ३६.५गू ओभरय् फुक्क विकेट तंकूसें २०१गू रन जक दयेकेफूगु खः । श्रीलङ्काया शुरुवाट बांलाःसां नं मध्यक्रमया ब्याट्सम्यानया ब्वज्या ताःमलायेवं सामान्य स्कोर जक दयेकेफूगु खः ।
श्रीलङ्काया नितंि कुशल परेरां ७८गू रन व कप्तान दिमुथ करुनरत्नें ३०गू दयेकूगु बाहेक मेमेपिं कासामितसें बांलाक्क रन दयेकेमफूगु खः ।
अफगानिस्तानयात बुकूसें श्रीलङ्कां न्हापांगु कासा त्याकूगु दु । थ्व स्वयां न्ह्यः म्हितूगु कासाय् श्रीलङ्कां न्यूजिल्याण्डलिसे १०गू विकेटं बूगु खः ।
मेखे अफगानिस्तान धाःसा लगातार निगूगु कासा नं बूगु दु । थ्व स्वयां न्ह्यः अफगानिस्तान अष्ट्रेलियालिसे पराजित जूगु खः ।
Categorized in कासा
