संकिपा नखःया टिकट व ट्रफि सार्वजनिक
लहनान्यूज | कौलागा एकादशी ११३७ (अक्टोबर १५ २०१७)
नेवाः फिल्म सोसाईटीं वरिष्ठ संकिपाकःमिद्वय चैत्यदेवी सिंह व मदनकृष्ण श्रेष्ठयात तःजिक हनीगु जूगु दु ।
सोसाईटीं ग्वसाः ग्वयेत्यंगु निक्वःगु संकिपा नखः व हना ज्याझ्वः ‘निक्वःगु ल्न्क् संकिपा नखः व ल्ँक् संकिपा सम्मान ११३७’स वयकःपिं निम्ह संकिपाकःमियात हनेत्यंगु खः । सोसाईटीं थौं यलय् पत्रकार सम्मेलनया ग्वसाः ग्वयाः सिंह व श्रेष्ठयात हनेत्यनागु जानकारी ब्यूगु खः ।
सोसाईटीं नेपाःया न्हापांगु संकिपा ‘आमा’य् आमाया भूमिका म्हितादीम्ह लिसें न्हापांगु रंगीन संकिपा कुमारीया मू नकिं चैत्यदेवी सिंहं संकिपा ख्यःयात बियादीगु योगदानयात च्वछासें सम्मान यायेत्यनागु न्ह्यथंगु दु ।
लिसें नाट्य, संगीत लिसें संकिपा मार्फत निरन्तर रुपं नेपालभाषा, कला, साहित्य ख्यःयात योगदान बियादीम्ह ख्यालि जुजु, वरिष्ठ कलाकःमि मदनकृष्ण श्रेष्ठयात नं हनेगु सोसाईटीं धाःगु दु । सम्मानित निम्हं कलाकःमिपिन्त विशेष गां न्ययेकाः, हनापौ व हना चिं कथंया ट्रफि लिसें हनेगु नखः कजि बिजेन्द्र बज्राचार्यं धयादिल ।
उगु हे ज्याझ्वलय् सम्मानया ट्रफिलिसें महोत्सवया टिकट नं सार्वजनिक याःगु खः । वरिष्ठ सिने पत्रकार, चलचित्र निर्देशक लिसें नेपालभाषाया न्हापांम्ह सिने पत्रकार विजयरत्न असंबरें ट्रफि व टिकट सार्वजनिक यानादिल ।
करुणामयया रथ जात्राया झ्वलय् करुणामययात विराजमान याकीगु रथया ढाँचाय् महोत्सवया ट्रफि दयेकूगु दु । थःगु न्ह्याग्गुं ज्याखँ वा ज्याझ्वः मार्फत नेपालया मौलिक संस्कृतिया पहिचान नं न्ह्यब्वया वनेगु आज्जुं थुगु ट्रफि दयेकागु सोसाईटीं न्ह्यथंगु दु ।
ज्याझ्वलय् सोसाईटीया दुजः आभाष धरानन्द राजोपाध्यायं उगु रथ व करुणामयया बारे जानकारी न्ह्यब्वयादिल ।
नुगःखँ तयेगु झ्वलय् वरिष्ठ सिने पत्रकार विजयरत्न असंबरें थुगु संकिपा नखः मार्फत नेवाः फिल्म सोसाईटीं आमा संकिपाया आमा चैत्यदेवी सिंह खः धइगु सुलाच्वंगु तथ्ययात न्ह्यःने हःगुलिइ लसता प्वंकादिल । लिसें सोसाईटीं अध्ययन, अनुसन्धान, वहस यानाववं संकिपा ख्यलय् थज्याःगु हे सुलाच्वंगु मेमेगु तथ्ययात नं न्ह्यःने हयेमाःगुलिइ बः बियादिल ।
व हे कथं सिने पत्रकार श्याम स्मृतं राज्यं नेवाः लिसें मेमेगु आदिवासी जनजाति संकिपाया लागिं मेगु सुविधाया नापं संकिपा क्यनेगु हलया नं व्यवस्था यानाबीमाःगुलिइ बः बियादिल । पत्रकारतय् न्ह्यसःया लिसः ब्युसें सोसाईटीया नायः लुःजः सिंहं आः नेवाः संकिपा नं प्रकृया पूवंकाः सम्बन्धित निकायस दर्ता जुया वनेमाःगु धासें दर्ता मयाःसे संकिपा दयेकेगु ज्या जुयाच्वंबलय् संकिपाकःमिपिं राज्यपाखें सुविधां छखे लानाच्वंगु नायः सिंहया धापू खः ।
थःपिन्सं आदिवासी जनजाति चलचित्र महासंघ मार्फत राज्ययाके बिस्कं हे आदिवासी जनजाति चलचित्र सेन्सर बोर्डया माग याना वयाच्वनागु सिंहं जानकारी बियादिल । लिसें नायः सिंहं आः सोसाईटीपाखें नेवाः संकिपाकःमिपिनिगु डाइरेक्टरी पिथनेगु तयारी न्ह्याकेगु नं धयादिल ।
सोसाईटीं थ्व हे कछलाथ्व सप्तमी शुक्रबार व अष्टमि शनिबार ( कार्तिक १० गते शुक्रबार र ११ गते शनिबार) या दिनस भृकुटिमण्डपस्थित नेपाल पर्यटन बोर्डय् संकिपा नखःया ग्वसाः ग्वयेत्यंगु दु । निन्हु यंकं जुइगु संकिपा नखलय् ९ संकिपा क्यनेत्यंगु दु ।
जापानय् फ्यूचर अफ एशिया अवार्ड त्याकेत ताःलाःगु संकिपा ‘पःखाः’ विशेष न्ह्यब्वयाया रुपय् क्यनीसा मेगु च्यागू संकिपा मध्ये छगूयात दर्शकया भोटया लिधंसाय् ‘स्वकुमि ल्यज्या सिरपाः’ (पब्लिक च्वाइस अवार्ड) बीगु नं सोसाईटीं न्ह्यथंगु दु । पब्लिक च्वाइस अवार्ड त्याकामियात दसिपौ लिसें ट्रफि लःल्हाइ ।
Categorized in मनोरन्जन
