संकिपा मुहुर्त धुंका गन वन ?
विजयरत्न असंबरे
संकिपा ख्यलय् मुहुर्त खँग्वः छगू चलनचल्तीया खँग्वः खः । थुकिया अर्थ धइगु छुं नं न्हूगु संकिपाया शुटिंग शुरु याय्त पिकाइगु न्हापांगु साइत खः । थ्व साइतय् अजाःगु न्हूगु संकिपाया न्हापांगु न्हिया शुटिङ्ग याइ । अले मुहुर्त ज्याझ्वलय् नांजाःपिं व्यक्तित्वतय्त पाहांकथं सःतातःगु दइ ।
अजाःपिं पाहांपिन्सं हे मुहुर्तया शुटिङ्गय् क्यामेरा चले याइ, अले मुहुर्तया निर्देशन याइ । अथेहेतुं मेमेगु क्वःछिनाकथंया ज्या नं याइ । अले मुहुर्त जूगु संकिपाया कलाकारपिन्सं डाइलग न्ववानाः अभिनय याना क्यनि । मुहुर्त कुन्हु जूगु शुटिङ्गया लू धाःसा संकिपाय् तइमखु । थथे मुहुर्त याय्गु धइगु “बलिउड परम्परा” खः । विशेषयानाः थःगु संकिपाया शुटिङ्ग शुरु जुल धकाः नाय्खिं च्वय्केगु त्वहः खः ।
थथे नाय्खिं च्वय्कूसां गुलिखे संकिपा मुहुर्तजक याय् सिधय्धुंकाः अनवं थनवं मदया वनेयः । अजाःगु संकिपा यक्व दु । हलिउड, बलिउड वा कलिउड धकाः धयातःगु खस नेपाली संकिपाया खँ मल्हाय्, नेवाः संकिपायात कयाःजक चर्चा याय् ।
“तंकाली” अजाःगु हे छगू न्हूगु नेवाः संकिपा” खः, गुगु संकिपाया मुहुर्त जूगु दच्छिति हे दय् धुंकल, तर आःतक थुकिया शुटिङ्गतकं न्ह्याःगु मदुनि । नेपालभाषाया सञ्चार ख्यलय् छम्ह नांजाःम्ह क्यामेरापर्सनकथं न्हाय् धस्वाका वयाच्वंम्ह शैलेश डंगोलं संकिपाया डाइरेक्शनय् पलाः न्ह्याकेगु कुतःया रुपय् बयबय् याःगु थुगु संकिपाया मुहुर्तयात नेवाः संकिपा ख्यःया हे छगू तःजिगु ज्याझ्वः धकाः धाइपिं यक्वः दु, तर तःजिक मुहुर्त जुलं नं शुटिङ्ग धाःसा शुरु जूगु मदुनि ।
“तंकाली”या शुटिङ्ग ला याकनं हे जुइगु ग्वसाः दु धइगु न्यने दु, तर छुंछुं अजाःगु नेवाः संकिपा नं दु, गुगु संकिपा मुहुर्त धुंकाः अनवं थनवं मदया वन । अजाःगु हे संकिपाया नां “सन्ध्या” खः । “मुद्दा” नांयागु छगू स्यल्लाःगु नेवाः संकिपा दय्कूम्ह निर्देशक रत्नकाजी महर्जन “लुनिभा”ं दय्के धकाः घोषणा याःगु “सन्ध्या”या मुहुर्त ज्याझ्वलय् नेपाःया छम्ह नांजाःम्ह नेता डा.बाबुराम भट्टराई व वय्कःया जहान नांजाःम्ह मिसा नेतृ हिसिला यमि तकं पाहांकथं झायादीगु खँ थन न्ह्यथनेबहःजू ।
अथेहेतुं च्यादँति न्ह्यः कलाकार मय्जु पल्पसा डंगोलं थःगु बुदिंया लसता हनेगु झ्वलय् याःगु छगू ज्याझ्वलय् “ढंग मदुनि” नांयागु छगू संकिपाया मुहुर्त याःगु खः । आर्यम नकःमिया निर्देशनय् दय्कीगु धकाः धाःगु उगु संकिपा नं आःतक दय्कूगु मदुनि । “ढंग मदुनि”या मुहुर्तय् नांजाःम्ह साहित्यकार व सञ्चारकःमि रमेशकाजी स्थापित मूपाहांकथं झायादीगु खः ।
थथे मुहुर्त धुंकाः तनावंगु मेगु छगू संकिपा “पलाः” नं खः ।
छम्ह सञ्चारकःमि व म्यूजिक भिडियोकःमिया रुपय् बिस्कं म्हसीका दुम्ह मनोजरत्न शाहीं संकिपा निर्देशनय् न्ह्याकेत्यंगु पलाःया रुपय् बय्बय् याःगु “पलाः”या च्वज्या पेजथ्री पत्रिकाया सम्पादक दर्शनबीर शाक्यं यानादीगु खः । लोकंह्वाःम्ह हिरोइन आशिष्मा नकःमिया केंहेँ मय्जु अन्जला नकःमिं हिरोइनया रुपय् न्हापांगु पलाः न्ह्याकेत्यंगुलिं बिस्कं महत्वं जाःगु संकिपा धकाः नं बय्बय् याःगु खः । थ्व संकिपाया मुहुर्त कमलादी गणेद्यःया थाय् याःगु खः । नेवाः संकिपा ख्यलय् “नन्स्टप फिल्ममेकर”कथं म्हसीका दुम्ह निर्देशक बासु शाही खः । वय्कलं तःगु हे नेवाः संकिपा दय्केधुंकूगु दु ।
बासु शाहीया दक्कलय् लिपांगु संकिपा धइगु “तानाज्यो” व “एकसे एक” खः । थ्वहे “एकसे एक” संकिपाया मुहुर्त याःबलय् नापनापं मुहुर्त याःगु मेगु छगू संकिपाया नां “श्री करुणामय” खः । सहकालया द्यः धकाः धयातःम्ह बुंगःद्यया बाखनय् दय्कीगु धकाः धाःगु थ्व संकिपाया च्वज्या नांजाःम्ह कलाकार ज्ञानेन्द्र इशारां यानादीगु खः धकाः धाःगु खः । नापं मुहुर्त जूगु “एक से एक” नांयागु संकिपा पिहांवय् धुंकल, तर “श्री करुणामय”या शुटिङ्ग जुइगु छुं संकेत खनेमदुनि ।
बासु शाहीया हे निर्देशनय् दय्कीगु धकाः छक्वः छगू संकिपा मुहुर्त यल सातदोबाटोया छगू सफूकुथि जूगु खः । उगु संकिपाया नां धाःसा आः काचाक्क लुमना मवल । उगु संकिपाया मुहुर्तय् नेपाःया संकिपाख्यःया नांजाःम्ह पुलांम्ह हिरो रविन्द्र खड्का नं पाहांंकथं झायादीगु खः । उगु संकिपाया यात्रा नं मुहुर्त धुंकाः न्ह्याःगु मदु ।
मुहुर्त धुंकाः पलाः द्यूगु नेवाः संकिपा मेमेगु नं दु । अजाःगु हे छगू संकिपा “छंगु नामय्” नं खः । कलाकार हरिश तण्डुकारया कुतलय् दय्केगु ग्वसाः ग्वःगु “छंगु नामय्” संकिपाया निर्देशक सुरेन्द्र तुलाधर खः । थ्व संकिपाय् पुलांम्ह मिस वल्र्ड नेपाल व कलिउड हिरोइन झरना बज्राचार्ययात हिरोइनकथं म्हितकेगु कुतः जूगु खःसा नेवाः संकिपाख्यलय् धिरेन शाक्ययात हिरोया रुपय् दक्कलय् न्हापां न्ह्यब्वय्गु ग्वसाः नं ग्वःगु खः ।
थ्व संकिपाया नं तःजिक हे मुहुर्त जूगु खः । थुकी झरना बज्राचार्ययात हिरोइन दय्केगु कुतः याःसां मुहुर्त जूबलय् धाःसा खस नेपाली संकिपा म्हिताच्वंम्ह अनु शाहयात हिरोइनयात न्ह्यब्वय् हःगु खः । धिरेन शाक्य व अनु शाहं मुहुर्त ज्याझ्वलय् ब्वति नं काल, तर उगु संकिपा नं मुहुर्त धुंकाः अनवं थनवं मदया वन । थथे छुंछुं संकिपा मुहुर्तजक यानालि दिकाछ्वःगु खनेदतसा गुलिखे संकिपा शुटिङ्ग क्वचाय्का वा क्वचाय् न्ह्यः अनवंथनवं मदयावंगु नं दु ।
निर्देशक प्रकाशराज मानन्धरया “काय्मचा ल्याय्म्ह”, निर्देशक राज शाक्यया “शंकरा” व “हाय् रे नखः” अले निर्देशक सूर्य श्रेष्ठया “थःगु छेँ” अजाःगु हे छुंछुं संकिपा खः, गुगु संकिपाया शुटिङ्ग क्वचाय् धुंकूसां संकिपा धाःसा स्वकुमिया न्ह्यःने आःतक नं वःगु मदुनि ।
