संक्रमितया नितिं छेँय् छेँय् वनाः स्वास्थ्य सेवा बीगु : मन्त्री गुरु
कछलाथ्व त्रयोदशी ११४१,जेष्ठ १० सोमवाः
सञ्चार तथा सूचना प्रविधिमन्त्री पार्वत गुरुङ्गं कोरोना संक्रमितया नितिं छेँय् छेँय् वनाः स्वास्थ्य सेवा बीगु योजना दयेकाच्वंगु धयादिल ।
खुक्वःगु पत्रकारिता दिवसया लसताय् सिंहदरवारय् याःगु ज्याझ्वलय् थःथिति मदुपिं व सकलें छेँजः संक्रमित जूपिनिगु सवालय् छेँय् छेँय् वनाः स्वास्थ्य सेवा बीगु तयारी यानाच्वंगु धयादीगु खः । मन्त्री गुरुङ्गं सुइत न नसा ज्वलं अभाव मजुइकेत अले स्वास्थ्य सेवा थ्यंनेमा धइगु ताः तयाः डोर टु डोर स्वास्थ्य सेवा न्ह्याकेगु तयारी जूगु धयादीगु खः ।
मन्त्री गुरुङ्गं महामारीया ईलय् सञ्चार गृहतय्त न ग्याचिकू ब्वलनीगु कथंया बुखँत सम्प्रेशन मयायेत छ्याता बियादिल । वय्कलं सञ्चार गृहतय्त गाईडलाइन्स दयेकाः परिपत्र यायेगु तयारी न्ह्यानाच्वंगु धासें फुक्क सञ्चारगृहतय्त दुथ्याकाः मन्त्रालयदुने हे बुखँ दयेकेगु नितिं छगू विस्कं पुचः दयेकेगु न धयादिल ।
मन्त्री गुरुङ्गं आःया अवस्थाय् कोभिडमुक्त यायेगु लँपुइ फुक्क सञ्चारमाध्यमतय्सं भूमिका म्हितेत न छ्याता बियादिल ।
Categorized in राष्ट्रिय
