२०८० चैत्र १६, शुक्रबार

संगीता शाक्यया सम्मानय् हना ज्याझ्वः

लहनान्युज | अनालाथ्व चौथी ११३८ (मे १८ २०१८)

स्वयम्भु वना पासा मुना मंकाः ग्वाहालि पुचःया ग्वसालय् छगू ज्याझ्वःया दथुइ म्ये हालामि संगीता शाक्ययात हंगु दु ।
 
 
संस्कृति पर्यटन व नागरिक उड्डयन मन्त्री मा. रविन्द्र अधिकारीया विशेष पाहाँसुइ जूगु ज्याझ्वलय् म्येहालामि शाक्ययात पुचःपाखें छगू लख व २५ द्वः तका दांलिसें हनापौ लःल्हाःगु खः ।
 
 
पुचःया छ्याञ्जेलिसें ज्याझ्वःया कजि पूर्णकाजी ज्यापुया सभापतित्वय् जूगु ज्याझ्वलय् पुचःया नायः पुष्पमान डंगोल, ज्ञानमाला भजन खलःया नायः तीर्थमान महर्जनलिसेंया उपस्थिति दुगु खःसा पुचःया दांभरिं हरिकृष्ण डंगोलं सकसितं लसकुस यानादीगु खः ।
 
येँ महानगरपालिकाया मेयर विद्या सुन्दर शाक्य, येँ क्षेत्र नं. ७ या सांसद रामवीर मानन्धर, वरिष्ठ गायक प्रेमध्वज प्रधान, समाजसेवी विश्वरत्न तुलाधरलिसेंया उपस्थिति दुगु खः ।
 
 
हना लिपा संगीता शाक्यया लोकंह्वाःगु थीथी म्ये नांजाःपिं म्ये हालामिपिं जुजुकाजी रंजित, पवित्र कसाः, निशा देसार, सरस्वती मानन्धर, केन्जुमा सुब्बा लिम्बु, सानुबाबु महर्जन, रत्नशोभा महर्जन, दीपा महर्जन, मानिक शाही, सोनी राजभण्डारी, सरिता प्रजापति, विरज महर्जन, पूर्णकाजी ज्यापु, रोजी श्रेष्ठपिसं यइपुगु म्येत न्यंकादीगु खः सा समय्बजि पुचःया ख्यालःलिसें नेपाः डान्स एकेडेमीपाखें यइपुगु हुलाप्याखंत न्ह्यब्वःगु खः ।
 
नुगःखँ तय्गु झ्वलय् विशेष पाहाँ संस्कृति मन्त्री रविन्द्र अधिकारीं थःपिसं कलाकारपिनि हितया निंतिं ज्या यानावयाच्वनागु खँ लुमंकादिसें कलाकारपिनि बौद्धिक सम्पत्तिया प्रतिलिपि अधिकार स्थापित याकेत व उकिया रोयल्टी बीकेगु निंतिं थःम्हं पहल यानागु खँ लुमंकादिल ।
 
 
वय्कलं म्हो मात्राय् हे जूसां रोयल्टी बीगु ज्या न्ह्याःगु व कलाकारपिनि दीर्घकालीन हितया निंतिं खुलाया दुने ग्यसुलाःगु नीति हय्गु खँ नं कनादिल ।
 
Categorized in मनोरन्जन