२०८० चैत्र १६, शुक्रबार

संघीय गठबन्धनं हाकनं आन्दोलन याइगु

लहना संवाददाता | ने.सं. ११३७ कछलागा बालाचःह्रे, २०१६ नोभेम्बर २८, सोमवाः

थःपिनिगु माग सम्बोधनया नितिं सरकार गम्भिर मजूगु धासें संघीय गठबन्धनं आन्दोलन यायेगु निर्णय याःगु दु । थौं च्वंगु गठबन्धनय् दुथ्याःगु दलतय्गु मुँज्यां सरकार नीस्वंगु इलय् जूगु स्वंगू बुँदाया सहमति पालना मयाःगुलिं आन्दोलनय् कुहांवयेगुया विकल्प मदुगु निष्कर्ष पिकाःगु खः ।
 
संविधान संशोधनया नामय् सरकारं म्वाःमदुगु चर्चा व हल्ला न्यंकाः थःपिन्त अलमल यायेत स्वःगु धासें सतक आन्दोलनपाखें हे माग पूवंकेगु धाःगु दु । मुँज्याया शुरुइ गठबन्धनया संयोजक उपेन्द्र यादवं स्वंगू बुँदाया सहमति कार्यान्वयनया नितिं झिंन्यान्हुया अल्टिमेटम क्वचाःसां तकं सरकार थुकियात कयाः गम्भिर मजूगु धयादिसें मोर्चाय् आबद्ध दलया धारणा तयादीत इनाप यानादीगु खः । गठबन्धनय् दुथ्याःगु दलया नेतातय्सं नं सरकार समस्या ज्यंकेत गम्भीर मजूगुुलिं परिस्थितिया ठोस विश्लेषण यानाः आन्दोलनय् कुहांवनेगुया विकल्प मदुगु धाःगु खः । सरकारं संविधान संशोधन प्रस्ताव हये न्ह्यः थःपिंलिसे छुं नं वार्ता मयाःगुलिं प्रस्तावया स्वामित्व ग्रहण यायेमफइगु खँ बः ब्यूगु दु । आन्दोलनय् कुहांवनेगु निष्कर्ष पिकाःसां आन्दोलनया ज्याझ्वः धाःसा सार्वजनिक याःगु मदुनि । थ्वहे झ्वलय् छुं दिं दुने शीर्ष नेतातय्गु उपस्थितिइ मुँज्या च्वनाः आन्दोलनया ज्याझ्वः क्वःछीगु फोरम गणतान्त्रिकया नायः राजकिशोर यादवं जानकारी बियादीगु दु ।
 
थौंया मुँज्याय् तराई मधेश लोकतान्त्रिक पार्टीया नायः महन्थ ठाकुर व सद्भावना पार्टीया नायः राजेन्द्र महत्तो अनुपस्थित जुयादीगु खः ।
Categorized in राजनीति