संघीय गठबन्धनया आन्दोलनया ज्याझ्वः सार्वजनिक
लहनान्यूज | चिल्लागा चतुर्थी ११३७ (मार्च १७ २०१७)
परिमार्जन लिसें संविधान संशोधनया माग याना वयाच्वंगु संघीय गठबन्धनं आन्दोलनया ज्याझ्वः सार्वजनिक याःगु दु ।
थौं च्वंगु गठबन्धनया मुँज्यां आन्दोलनया ज्याझ्वः क्वःछिनाः सार्वजनिक याःगु खः । गठबन्धनं प्रेस विज्ञप्ती जारी यासें आन्दोलनया झ्वलय् चैत ३ गते सरकारयात बियागु समर्थन लित कायेगुनिसें वइगु चैत २१ गतेतक्क थीथी ज्याझ्वः सार्वजनिक याःगु खः ।
थ्व हे झ्वलय् गठबन्धनं चैत ४ गतेनिसें जनअवज्ञा व असहयोग आन्दोलन न्ह्याकेगु नं न्ह्यथंगु दु । अथे हे जिल्ला सदरमुकाम व प्रमूख बजारय् वनाः स्थानीय तगिंया निर्वाचन प्रादेशिक क्षेत्राधिकार दुने छाय् धइगु विषयस सार्वजनिक सुनुवाइ, श्रद्धान्जलि सभा लिसें माइतीघर मण्डलाय् दीप प्रज्वलन ज्याझ्वः नं यायेगु न्ह्यथंगु दु ।
उकिया लिसें गठबन्धनं देयया थीथी लागाय् जनप्रदर्शन व विरोध सभा नं याइगु जूगु दु । संघीय गठबन्धनं चैत १५ गतेनिसें चैत २१ गतेतक्क धनगढि, कैलाली, पोखरा, उदयपुरलिसें थीथी थासय् जनप्रदर्शन लिसें विरोध सभा यायेगु धाःगु दु ।
Categorized in राजनीति
