२०८० चैत्र १६, शुक्रबार

संघीय सरकार विरुद्ध प्रदेश २या सरकारपाखें सर्बोच्चय् रीट दायर

लहना न्यूज | ने.सं. ११३९ दिल्लागा आमै (१ अगष्ट, २०१९), विहिवाः

प्रदेशया अधिकार क्षेत्रय् दुगु सागरनाथ वन परियोजना लाका कयाः नेपाल वन लिमिटेड दयेकेगु संघीय सरकारया क्वःछिनायात हाथ्याः ब्यूसें प्रदेश २या सरकारं सर्बोच्च अदालतय् रीट दायर याःगु दु ।
 
संघ–प्रदेश दथुइ साधन श्रोतया बाँडफाँडय् विवाद जुयाच्वंगु इलय् अधिकार क्षेत्र क्वत्यःगु धासें थौं विहिवाः सर्बोच्च अदालतय् प्रदेश २या सरकारं रीट दायर याःगु थ्व हे न्हापांगु खः ।
 
प्रदेश २या उद्योग, बन, वातावरण नापं पर्यटन मन्त्रालयं नेपाल वन लिमिटेड खारेजया नितिं परमादेश जारीया माग यासें सर्बोच्च अदालतय् मुद्दा तःगु खः । रीटयात कयाः शुक्रवाः पेशी जुइ ।
 
सर्लाही, महोत्तरी व रौतहटया १८द्वः हेक्टर लागाय् न्यनाच्वंगु सागरनाथ वन परियोजना प्यला न्ह्यः हे मन्त्रीपरिषदपाखें निर्णय यानाः प्रदेश २या सरकारं थःगु मातहतय् हःगु खः । मन्त्रीपरिषदं याःगु निर्णययात संघीय सरकारयात पौपाखें जानकारी याकूगु खः ।
 
प्रधानमन्त्री ज्याकुथिं जेठ २३ गतेया निर्णयकथं सागरनाथ वन परियोजनायात ‘द टिम्बर कर्पोरेशन’य् मर्ज याःगु खः । मर्जरलिपा सागरनाथ वन परियोजनायत वन निगम कम्पनीइ दर्ता यायेगु संघीय सरकारया क्वःछिना हस्तक्षेप जूगु प्रदेश २या वन मन्त्री रामनरेश रायं धयादिल ।
 
रीट निवेदनय् सागरनाथ वन परियोजना परियोजना प्रदेश २ दुनेया बनयात कम्पनीइ यंकेगु संघीय सरकारया निर्णय खारेजीया माग यासें वन मन्त्रालयपाखें कर्मचारी बेचन महतों थौं विहिवाः सर्बोच्च अदालतय् रीट निवेदन दायर याःगु खः ।
 
शुक्रवाः जुइगु सुनुवाइस प्रदेश सरकारपाखें प्रमुख न्यायाधिवक्ता दीपेन्द्र झां वहस यानादी ।
Categorized in राजनीति