२०८१ आषाढ ५, बुधबार

संविधानया कार्यान्वयन थौंया महत्वपूर्ण ज्या खः : सभामुख

लहनान्युज | अनलाथ्व २ ११४०, असोज ३ सनिवाः

सभामुख अग्निप्रसाद सापकोटां संविधानय् दुगु व्यवस्थाया प्रभावकारी कार्यान्वयन थौं महत्वपूर्ण ज्या खँ धका धयादिगु दु । 
 
संविधान दिवस, २०७७ या लसताय् थौं भिंतसना सन्देश बियादिसे वयकलं सङ्घ, प्रदेश व स्थानीय तहया दथुइ मंकाः अधिकारया क्षेत्राधिकार व उकिया लिच्वंंया सम्बन्धय् विवाद जुइ मज्युलि सचेत जुइ माःगु जोड बिःगु दु ।  
 
“संविधानअनुरुप निर्माण जुगु ऐनया नियमावली निर्माणय् ढिलाइ जुगु गुनासा सम्बोधन याये माःगु व कानून दयेकेगु तर नागरिकं प्रतिफल काये मफइगु अवस्था वयेके मबिइगु सम्बद्धक दक्कोसिगु ध्यानाकर्षण याये चाहे जुगु”, सन्देशय् वयकलं धयादिगु दु । 
 
सभामुख सापकोटां थौं विशेष दिं दक्कोसिया संविधानया मर्म व भावना कथं ज्या यायेगु प्रेरणा दइगु विश्वास व्यक्त यानादिगु दु ।
 
वयकलं नेपालया संविधान धारा १०९ य् सङ्घीय संसद् या व्यवस्थापकीय अधिकार, धारा १९७ य् प्रदेशसभाया व्यवस्थापकीय अधिकार व धारा २२१ य् स्थानीय तहया व्यवस्थापकीय अधिकारया व्यवस्था याःगु कारण स्वगू तहया कानून दयेकेगु अधिकार दइगु व माःगु कथं कानूनया निर्माण व कार्यान्वयन यायेगु खँ लुमकादिगु दु । 
 
संविधान गतिशील दस्तावेज जुगु उल्लेख यानादिसे सभामुख सापकोटां नीतिनिर्माण तथा राज्यया थीथी संयन्त्रय् समावेशिताया व्यवस्था याःगु दु धका न धयादिगु दु । 
सङ्घ, प्रदेश व स्थानीय तह (समन्वय तथा अन्तरसम्बन्ध) कानून दुगु व संविधान नाप ल्वागु कानून संशोधन जुइ धुकुुगु धका वयकलं प्रदेश व स्थानीय तह न थःगु एकल अधिकार अन्तर्गतया कानून दयेका कार्यान्वयनय् हयेमा धका धयादिगु दु । 
 
नेपालया संविधान नेपालया अग्रगामी ह्यूपा हयेगु पक्षधर जनताया सङ्घर्ष व शहीदया बलिदानया लिच्वः जुगु उल्लेख यानादिसे वयकलं शहीदया साहस, अग्रगामी परिवर्तन तीव्र इच्छाशक्ति एवम् बलिदानीपूर्ण सङ्घर्षया कारण नेपालया संविधान निर्माण जुगु खँ धका धयादिगु दु ।
Categorized in राष्ट्रिय