संविधान संशोधनया नितिं राजपापाखें रुलिङया माग
लहनान्युज | ने.सं. ११३९ तछलाथ्व पारु (४ जुन, २०१९) मंगलवाः
राष्ट्रिय जनता पार्टी राजपां संविधान संशोधनया नितिं सभामुखया रुलिङ माग याःगु दु ।
संविधान जारी जूसांनिसें हे संशोधनया मुद्दा ल्ह्वना वयाच्वंगु राजपां थौं मंगलवाः सभामुखपाखें हे रुलिङ यायेत माग याःगु खः ।
प्रतिनिधिसभाया थौंया मुँज्याया शुरुइ ई कयाः न्ववानादिसें राजपाया सांसद प्रमोद साहं संविधान संशोधन अपरिहार्य जूगु धयादिसें सभामुखं “रुलिङ” यायेमाःगु धयादिल ।
साहं संविधान संशोधनया माग यासें जूगु आन्दोलनय् १२५म्हेसिगु ज्यान वनेधुंकाः तक नं सरकार संविधान संशोधन यायेत तयार मजूगु द्वपं बियादिल । आवश्यकता व औचित्यया लिधंसाय् संशोधन जुइ धइगु सरकारया धापूयात कयाः तराई मधेसया जनता अजू चाःगु साहया धापू खः ।
संविधान दयेकीपिन्सं हे उकियात हाचां गायेत न्ह्यज्यानाच्वंगु धयादिसें साहं स्थानीय तहया नितिं लोकसेवा आयोगं चायेकूगु विज्ञापन व सरकारं हःगु बजेट संविधानया मंर्म अःखः जूगु नं साहं धयादिल ।
Categorized in राजनीति
