संविधान संशोधन प्रस्तावय् नेरापाया विरोध
लहनान्यूज सम्वाददाता | थिंलाथ्व षष्ठी ११३७ (डिसेम्बर ५ २०१६)
नेपाःया न्हूगु संविधानया निक्वःगु संशोधनकथं व्यवस्थापिका संसदय् दर्ता याःगु प्रस्तावयात कयाः नेपाः राष्ट्रिय पार्टीं विरोध याःगु दु ।
पार्टीया मूछ्याञ्जे डा. विजयप्रकाश सैंजुं ल्हाःचिं तयाः पिथंगु प्रेस विज्ञप्तीइ संसदय् दर्ता जूगु संशोधन प्रस्ताव राष्ट्र व जनताया आकांक्षाकथं मजूगु व थुकिं देशय् अस्थिरता, असुरक्षा व अशान्ति ब्वलनीगु न्ह्यथनातःगु दु ।
विज्ञप्तिइ संशोधन प्रस्तावय् संघीय गठबन्धनया २६गू बुँदाया मागयात संबोधन मयाःगु नापं पहिचान मदुगु संशोधन प्रस्तावय् नेपाः पार्टिया आपत्ती दुगु धयातःगु दु । लिसें नेपालभाषाया लिसें थीथी जनजातिया भाषायात राष्ट्रिय ज्याखँया भाषाकथं मान्यता मबीकथंसंविधान संशोधन प्रस्ताव वःगुलिं थुकियात कयाः बिरोध यानागु नं नेपाः पार्टिं न्ह्यथंगु दु ।
थ्व हे झ्वलय् पार्टीपाखें झिगू प्रदेश नामांकन व पहिचान सहितया प्रदेशकथं संशोधन न्हूगु संविधानय् जुइमाःगु पार्टिं माग याःगु दु । लिसें देशया दक्व भाषायात राष्ट्रभाषा व सरकारी ज्याखँया भाषाकथं मान्यता बीमाःगु नं पार्टिया माग खः ।
Categorized in राजनीति
