राष्ट्रिय जनता पार्टी नेपालया छम्ह शीर्ष नेतां संविधान संशोधन मजूतले थःपिनिगु पार्टीं सरकारय् ब्वति मकाइगु धयादीगु दु । अध्यक्ष मण्डलया दुजः अनिल झां संविधान संशोधन जुल धाःसा जक थःपिं सरकारय् वनेगु खँय् विचाः यायेफइगु धयादिल । आः हे थःपिं सरकारय् वनेगु खँय् छुं नं बिचाः मयानागु वय्कःया धापू खः ।

म्हिगःया दिनय् संविधान संशोधन याये हे मज्यू धइगु व दुई तिहाई थ्यंके मब्यूगु नेकपा एमालें आः सरकारया नेतृत्व यानाच्वंगु खँ धयादिसें नेता झां थःपिं संशोधनया पक्ष जूगु व वर्तमान प्रधानमन्त्री केपी शर्मा ओली संशोधनया नितिं ईच्छुक जू व मजू धकाः न्ह्यसः तयादिल । एमाले, माओवादी केन्द्र लिसें राष्ट्रिय जनता पार्टी व संघीय समाजवादी फोरम मिले जुल धाःसा दुई तिहाई बहुमत थ्यनीगु व संविधान संशोधन जुइगु वय्कलं धयादिल । संविधान संशोधन पक्षधर जूगुलिं राष्ट्रिय जनता पार्टी व संघीय समाजवादी फोरमं उखेथुखे यायेगु अवस्था मदुगु नेता झाया धापू खः ।

Categorized in राष्ट्रिय