२०८० चैत्र १६, शुक्रबार

संविधान संशोधन यायेफइ : प्रम ओली

ने.सं. ११३३८ चिल्लागा १२ (१४ मार्च २०१८), बुधवाः

प्रधानमन्त्री केपी शर्मा ओलीं आवश्यकता व औचित्यया आधारय् संविधान संशोधन यायेफइगु धयादीगु दु ।
 
 
प्रतिनिधिसभा, राष्ट्रियसभा नापं प्रदेशसभा सांसदपिनिगु सम्मानय् थौं बुधवाः बालुवाटारय् ग्वसाः ग्वःगु तुच्चा ज्याझ्वःयात सम्बोधन यानादिसें प्रधानमन्त्री ओलीं उगु खँ धयादीगु खः । वय्कलं देशयात थप मजबूत नापं एकताबद्ध यायेगु नितिं संशोधन जुइगु खँ धयादिसें देशयात स्यंकीगु व अखण्डताय् लिच्वः लाइगुकथं संशोधन मजुइगु नं स्पष्ट यानादिल ।
 
 
सरकार हिंसा व अपराध पनेगु नितिं न्ह्याथेंजाःगु परिस्थिती नं न्ह्यज्यायेगु प्रधानमन्त्री ओलीं धयादिल, ‘आः बलात्कारया घटना दी । मिसा हिंसा विरुद्ध जागरण अभियान न्ह्याकी ।’ कडा कानून दयेकाः कार्यान्वयन याइगु नं धयादीगु दु ।
 
 
ओलीं थः भ्रष्टाचारयात कयाः असहिष्णु जुइगु नं धयादिल । थ्व हे झ्वलय् ओलीं सांसदपिन्त मर्यादाय् च्वनेत निर्देशन बियादिसें सांसदया हरेक ज्याखँ जनताया हीतय् जुइमाःगु खँय् बः बियादिल ।
 
 
ज्याझ्वलय् नेकपा एमाले, नेकपा माओवादी केन्द्र, संघीय समाजवादी फोरम व राष्ट्रिय जनता पार्टीया प्रतिनिधिसभा, राष्ट्रियसभा व प्रदेशसभाया सांसदपिनिगु उपस्थिति दुगु खः ।
Categorized in राजनीति