संशोधनया नामय् कासा जुयाच्वंगु : एमाले नेता ज्ञवाली
लहनान्यूज सम्वाददाता | कछलाथ्व पञ्चमि ११३७ (५ नोभेम्बर २०१६)
नेकपा एमालेया सचिव प्रदीप ज्ञवालीं संविधान संशोधनया नामय् देशय् ग्यानापुस्सेच्वंगु कासा जुयाच्वंगु धयादीगु दु ।
प्रेस चौतारी नेपाल, रुपन्देहीं थौं बुटवलय् ग्वसाः ग्वःगु पत्रकारत नापलायेगु झ्वलय् सचिव ज्ञवालीं उगु खँ धयादीगु खः । वयकलं सरकारं आःतक संविधान संशोधनया खँ ल्हाःसां नं उकियात पुष्टि यायेमफूगु नं धयादीगु दु ।
नेता ज्ञवालीं अंगीकृत नागरिक नं राष्ट्रप्रमुख जुइ दयेमाःगु, हिन्दी भाषायात राष्ट्रिय भाषा दयेकेमाःगु व प्रदेश ल्याः ५ या पहाडी जिल्ला गुल्मी, पाल्पा व अर्घाखाँचीया अलग्ग तयेत मागलिसें वःगु संविधान संशोधनया खँ छुं नं कथं स्वीकार याये मफइगु धयादिल ।
सरकारं वइगु माघतकया दुने स्वंगु हे तहया चुनाव यायेमाःगु जूसां नं आःतक उकिया छुं नं प्रकृया न्ह्यःने यंकेमफूगुलिं संविधान हे संकटय्लाइगु अवस्था ब्वलंगु धयादिसें नेता ज्ञवालीं थुकियात कयाः सरकार संवेदनशील मजूगु द्वपं तकं बियादिल ।
Categorized in राजनीति
