राष्ट्रिय मानव अधिकार आयोगं संसदय् दर्ता जूगु मिडिया काउन्सिल सम्बन्धि कानूनयात संशोधन व एकीकरण यायेत दयेकूगु विधेयकयात लोकतन्त्र व मानवाधिकारया मूल्य मान्यताकथं दयेकेत सरकारया ध्यानाकर्षया याकूगु दु ।

 

आयोगं थौं बुधवाः विज्ञप्ति पिथंसें विधेयकया थौकन्हय् दयाच्वंगु प्रावधानयात कयाः आपत्ति प्वंकूसें नियमनया नामय् नियन्त्रण यायेगु मानवाधिकारया मूल्य मान्यता अःखः जुइगु न्ह्यथनातःगु दु । सरोकारवालालिसे परामर्श व सहलहपाखें परिमार्जन यानाः नागरिकया बिचाः व अभिब्यक्ति स्वतन्त्रतायात कुण्ठित यायेगु लकस ब्वलंके मबीकेत आयोगं इनाप तकं याःगु दु । आयोगपाखें पिथंगु विज्ञप्ति न्ह्यथनातःगु दु, ‘थौंकन्हय् दयाच्वंगु प्रेस काउन्सिल ऐन, २०४८या प्रभावकारी व्यवस्थाय् कारण हे मदयेकं हिलाः थुकिया स्वायत्तताय् अंकुश तयेत स्वयेगु मानवाधिकारया आधारभूत मान्यता व अभिव्यक्ति स्वतन्त्रता प्रतिकूल जूवनीगु आयोगया निष्कर्ष दु ।’