संसदीय समितिइ एमालेया विवाद
दिल्लागा द्धितिया ११४१, साउन ११ सोमबाः
नेपाल कम्युनिष्ट पार्टीया आन्तरिक ल्वापु संसदीय समितिइ नं खनेदयावःगु दु ।
एमाले नायः केपी शर्मा ओली पक्षया सांसद नारदमुनि राना व वरिष्ठ नेता माधवकुमार नेपाल दथुइ ल्वापु जुइधुंकाः प्रतिनिधिसभाया अन्तर्राष्ट्रिय सम्बन्ध तथा श्रम समितिया म्हिगःया मुँज्या विषय प्रवेशै हे मयाःसे स्थगित जूगु दु ।
समितिं थ्वयां न्ह्यः जारी याःगु निर्देशनत कार्यान्वयन मुँज्याय् एजेण्डा तयातःगु खः । तर मुँज्याया शुरुइ हे नवासें नेता नेपालं प्रतिनिधिसभा पुनस्र्थापना जूगुलिइ लसता प्वंकादिल ।
छुं ई लिपा मुँज्याय् दुहांवःम्ह ओली पक्षया सांसद नारदमुनि रानां प्रतिनिधिसभा सर्वोच्चया आदेशं पुनस्र्थापना जूगु धासें प्रतिनिधिसभा विघटनया भाला माधव नेपालपिन्सं कायेमाःगु टिप्पणी यानादिल । रानां वैशाख २७ गते ओलीं संसदय् विश्वासया मत काःबलय् छेँय् द्यनाच्वंपिन्सं प्रतिनिधिसभा पुनस्र्थापना जुल धकाः हालेगुया औचित्य मदुगु तर्क यानादिल ।
रानां नवानाच्वँच्वं दथुइ हे दनाः नेपाल पक्षया दिपकप्रकाश भट्टं तस्सलं ’प्रतिगमनया मतियार’ धासें रानायात पनेत स्वयाद्यूगु खः । माधव नेपालं नं प्रतिगमनया मतियारयात संसदय् च्वनेगु अधिकार मदु धासें राजीनामा बियाः पिहांवनेत धायेधुंकाः स्थिति तनावग्रस्त जूगु खः ।
कांग्रेस व माओवादीया सांसदतय्सं नं नेपाल पुचःयात साथ ब्यूगु खः । कांग्रेस सांसद दिव्यमणि राजभण्डारीं संविधान विरोधी खँ ल्हाःगु धासें रानायात ब्वः बियादिल ।
समितिया सभापति पवित्रा खरेलं नवायेत ई बीत स्वःसां भट्टं रानायात नवाये हे मब्यूगु खः । छम्ह लिपा मेम्ह सांसदं पक्ष विपक्षय् नवानाहःबलय् समितिया दुजःपिं मुँज्यां पिहांवंगु खः ।
Categorized in राजनीति
