संसद् विघटनसम्बन्धी मुद्दाया बहस थौं क्वचाइगु
बछलागा दशमी ११४१, असार २० गते आइतबाः
प्रधानमन्त्री नियुक्ति व संसद् विघटनसम्बन्धी मुद्दाय् थौं सभामुख अग्निप्रसाद सापकोटायापाखें बहस क्वचायेधुंका जवाफी बहस जुइत्यंगु दु ।
सभामुखया पाखे. वरिष्ठ अधिवक्तापिं श्यामप्रसाद खरेल, लभकुमार मैनाली, उपेन्द्रकेशरी न्यौपाने व अधिवक्तापिं मेघराज पोखरेल व श्रीकृष्ण सुवेदीं बहस यानादी । उमिगु नितिं निघौया ई क्वजिउगु दु । ‘टि–ब्रेक’ न्ह्यः सभामुखयापाखें बहस क्वचायेका थौं हे निवेदकया जवाफी बहस न्ह्याइ ।
निवेदकं राष्ट्रपतिया ज्याकु, प्रधानमन्त्री व सभामुखयात विपक्षी दय्कुगु जूसा नं संसद् विघटन व प्रधानमन्त्री नियुक्तिइ सभामुखया बिस्कं मत दूगु हुनिं बिस्कं हे बहस जुइत्यंगु खः । थ्वयान्ह्यः राष्ट्रपति व प्रधानमन्त्रीयापाखें सरकारी व निजी याना ३२ म्ह कानुन व्यवसायीं १४ घौ बहस याःगु खः ।
बहस वंगु असार ९ गते निसें न्ह्यागु खः । न्हापा निवे्दक पक्षया ३६म्ह कानुन व्यवसायीं १२ घौ बहस याःगु खः । जवाफी बहसया नितिं ३ घौ ई बिउगु दु । जवाफी बहस थौं हे क्वचाइगु संभावना धाःसा म्हो जक दु ।
निवेदकयापाखें वरिष्ठ अधिवक्तापिं रमनकुमार श्रेष्ठ, बद्रीबहादुर कार्की, हरिहर दाहाल व शम्भु थापां जवाफी बहस यानादी । उमिगु बहस क्वचायेधुंका सोमबाः एमिकस क्युरीयापाखें २ घौ राय तइगु लिसें थुगु मुद्दाया फैसला जुइ ।
Categorized in राजनीति
