सक्वय् लच्छियंक धलं दनिगु ः माधव नाराण मेला
लहनान्युज | पोहेलागा औसी ११३८ (जनवरी १६ २०१८)
दँय्दसं थें थुगुसी नं सक्वया नादी खुसी माधव नारायण स्वस्थानी धलं दनीगु ज्या पौष १७ गते सोमवाःनिसें निसि यानाः म्वः ल्हुयाः चि भ्वय् नया वयाः कन्हय् कुन्हुनिसें सुरु जूगु दु ।
मिला पुन्हिनिसें सि पुन्हितक लच्छियंक माधबनारायण स्वस्थानी धलं दनीगु झ्वलय् माधबनारायण द्यःया नापनापं नियमकथं जूपिं नेवाःत, गैरनेवाःत नं स्वस्थानी धलं दनीगु खः । छेँय् छेँय् च्वनाः स्वस्थानी धलं दनेगु नियम स्वयां बिस्कं अले थाकूगु नियमय् च्वनाः सक्वया नादी खुसि सिथय् धलं दनेगु ज्याझ्वः सक्वया मौलिक बिस्कं च्वनाः धलं दनेगु ज्या याना वःगु खनेदु ।
मिला पुन्हि छन्हु न्ह्यः सक्वया ज्योतिर्लिङ्गेश्वर महाद्यःया न्ह्यःने न्ह्यानाच्वंगु सुन्दरीघाट धइगु धलय् म्वः ल्हुयाः महाद्यःया दर्शन यानाः माधवनारायण द्यःयात किसलि छायाः जल कयाः धलं दनेगु सुरु याइ । उबलेनिसें नीसी यानाः व्यागलं क्वथाय् च्वनाः लच्छियंक लाकां मोजा तकं मथ्यूसें चि अमय भ्या मयासें सुथ न्हापं शंख पूवलकि सक्वं दनाः नादी खुसि सिथय् थ्यंक वनेमाः ।
मिजं धलं दनीपिं जक छन्हु न्ह्यः नीसी यानाः माधव नारायण द्यःनापं हे नादी खुसी सिथय् धलंपुलि द्यनाच्वंपिं दनाः नीसी यानाः माधब नारायण द्यःनापं नादी खुसी बिज्याकाः म्वः ल्हुकिबलय् मिसा मिजं सकलें छक्वलं म्वः ल्हुइगु ज्या याइ । नारायण द्यःयात आसनय् विज्याकीसा मिस्तय्सं द्यःयात लः पासः छानाः दर्शन भागी याइ ।
मिजंतय्सं लखय् म्हनापं दुनाः म्ह दुछिं दुं दनाः नारां द्यः भागी यानाः अष्टमातृका स्वस्थानी पीठ भागी याइ । सञ्चरवाः व एकादशी कुन्ह, श्रीपञ्चमी व लला सप्तमी कुन्हmु भिंद्यः, ससुद्यः व गंछि द्यःपिं थ्यंक म्हं दुं दनाः भागी याःवने माःगु नियम दुु ।
न्हिं छक्वः धलं दंकाः सक्वय् नारांद्यः बिज्याकाः सक्वय् देशं दुने पिने यंकाः सच्छि व च्याथाय् सहश्रजलधारा माधवनारायण द्यः दुगु कलशय् लः हाय्काः थीथी द्यःपिंत दर्शन याइसा मिस्तय्सं कलशय् लः छाय्गु याइगु खः ।
