हलिमय् दकलय् तःजाःगु च्वापुगुँ सगरमाथाया वास्तविक जाः खुलाया दुने सार्वजनिक यायेगु सरकारया तयारी जुयाच्वंगु दु ।

 

भूमि व्यवस्था, सहकारी तथा गरिबी निवारण मन्त्री पद्माकुमारी अर्यालं सगरमाथाया जाः नापे यायेगु नितिं च्वकाय् थ्यंकाः लिहांवःगु पुचःयात लसकुस यानादिसें ऐतिहासिक सफलता प्राप्त जूगु धयादिल ।

 

वि.सं. २०७२सालया विनाशकारी भुखाचं सगरमाथाया जाः थाहाँकुहाँ जूगु खँ पिहांवःगु खँयात ध्यानय् तयाः नापी विभागं थःगु हे श्रोत साधनया ग्वाहालिं जाः नापे यायेगु ज्या न्ह्याकूगु खः ।

 

नापी विभागया प्रमुख नापी अधिकृत खिमलाल गौतमया संयोजकत्वय् प्यम्हेसिगु पुचलं वंगु जेष्ठ ८ गते सर्बोच्च शिखर सगरमाथाया सफल आरोहण याःगु खः । संयोजक गौतमलिसें नापी अधिकृत रविन कार्की, विभागया नापी अमिन सर्वेक्षक युवराज धिताल, सर्वेक्षक सुरज सिंहया पुचलं बैशाख २८ गतेनिसें सगरमाथाया आरोहण यात्रा न्ह्याकूगु खः । उगु पुचः थ्यंमथ्यं निघौतक च्वकाय् हे च्वनाच्वंगु खः । उगु पुचलं १घौ व २०गू मिनेटतक जि.एन.एस. व जि.पी.एस जडान यानाः सर्वेक्षण याःगु खः ।

 

सगरमाथाया वास्तविक तथ्याङ्क मुंकेगु ज्या जुइधुंकूगु व मेमेगु स्थलगत सर्वेक्षणपाखें तथ्याङ्क वयाच्वंगुलिं फुक्क तथ्याङ्क वयेधुंकाः थुकिया वास्तविक जाः सार्वजनिक यायेगु विभागया तयारी दु ।