सगरमाथा गःपि पत्रकारपिन्त हन
लहनान्युज | तछलाथ्व तृतिया ११३८ ( जुन १६ २०१८ )
हलिमय् दकले तःजागु च्वापुगुँ सगरमाथा सफल आरोहन यापि मिसा पत्रकारपि कल्पना महर्जन, पूर्णिमा श्रेष्ठ, रोशा बस्नेत, देउराली चाम्लिङपिन्त नेवाः प्रेस दबू व नेपालमण्डल साहित्यिक प्रतिष्ठानं मंकाः कथं हना ज्या याःगु दु । रोजिना बुद्धाचार्य सफल आरोहन यानाः विदेश वने धुंकूगु दु ।
मूपाहाँ समाजसेवि मोती लाल शिल्पकारं छगु ज्याझ्व दथुइ हने ज्या याःगु खः । पाहाँ कथं नेपालभाषा मंकाः खलःया नायः ऋषि प्रसाद श्रेष्ठ, स्यस्यः समाजया नायः उत्तम लाल श्रेष्ठ, ताम्राकार समाजया नायः रविन्द्र राज ताम्राकारपिं झायादीगु खः ।
न्वचूया झ्वलय् मूपाहाँ शिल्पकार नःलिपिं मिसा मस्तय्सं हलिमय् दकले तःजागु च्वापुगुँ गःवनीगु बुखँ न्यनाबलय् ‘छु म्वाःमदुगु ज्या याःजूगु थ्व मस्तय्सं’ धइगु मतिइ वःगु खःसां थौं हलिमय् हे गर्व याये फइगु ज्यायाना वःगुलिं मय्जुपिन्त भिंतुना बिसे आँत यात धाःसा न्ह्याथेंजाःगु साहसिक ज्यानं याये फइगु ज्ञां थुगु ज्याझ्वलं कायेमाःगु कनादिल ।
नेवाः प्रेस दबूया नायः नरेन्द्र श्रेष्ठया नायःसुइ दबूया न्वकू मञ्जु बज्राचार्यं न्ह्याकादीगु उगु ज्याझ्वलय् नेपालमण्डल साहित्यिक प्रतिष्ठानया न्वकू सगेन्द्र महर्जनं लसकुस न्वचू तयादीगु खः ।
उगु ज्याझ्वलय् प्रेस दबूया सल्लाहकार नरेन्द्र राजभण्डारी, साहित्यकार जगमोहन वाःमि, कल्पना महर्जन, पत्रकार कुमार रञ्जितपिसं न थःथःगु नुगः खँ तयादीगु खः ।
नाप वरिष्ठ गायक जुजुकाजी रञ्जितं २२ सालस्वयां न्ह्यहे नारायण देवीं परिकल्पना यानाः च्वयातःगु म्ये आः वया साकार जूगु खँ न्ह्यथंसे म्ये हालाः न्यंकादीगु खः ।
बुखँ नेवाः सुचना केन्द्र
किपा राजेन्द्र रंजित
