सडक छायपीगु ज्याय् येँ महानगर
बिराजकाजी राजोपाध्याय | बछलागा पञ्चमी ११४०
थीथी कथंया माग तयाः माइतिघर मण्डला व वया जःखःया क्षेत्रय् लकडाउनया इलय् तकं भिडभाड हे जुइगु याः । मंगलबाः नं अन छपुचः मुनाच्वंगु खनेदत, तर मेपिं मखु नगर प्रहरी ।
उपिं अन छुं नाराबाजी या आन्दोलन यायेत मुंगु मखसें सडक जःखः सिथय्, अले दथुइ अप्वयावःगु घाय्, मा चायेगु, झार पुयाः सडकयात चिटिक्क दयेकेगु अभियानय् जाःगु खः ।
लकडाउन न्ह्याःगुलिसें कोरोना संक्रमणयात महानगर क्षेत्र दुने न्यंकेमबीत सार्वजनिक थासय् कीटनाशक वासः छ्वाकेगु, लखं सडक च्वयेकेगु, बु्रमरं सडक यायेगु थुज्वःगु ज्या यानावःगु येँ महानगरपालिकां न्ह्याकूगु थुगु अभियानय् मंगलबाः करीब ४०म्ह धइथें नगर प्रहरी सामाजिक दुरी कायम तसें यचुपिचु अभियानय् सक्रिय जुल ।
लकडाउनलिसं सडक सिथय् व दथुइ माया कचा पिहांवयाः सडकया सौन्दर्य स्यंकेधुंकाः छाँटकाट यायेगु, झार पुइगु, सीधुंकूगु मा पुइगु थुज्वःगु ज्या न्ह्याकागु नगर प्रहरी प्रमुख धनपति सापकोटां जानकारी बियादिल ।
‘न्हापांगु चरणय् अरनीको राजमार्ग अन्तर्गत माइतीघर मण्डलानिसें तीनकुनेतक्कया क्षेत्रय् लाःगु सडकया जःखः सिथय् व दथुइ थहांवःगु माया कचा छाँटकाट यायेगु, झार पुइगु व सडकया सौन्दर्य कायम तयेगु योजना लिसें ज्या न्ह्याकागु दु’ सापकोटां धयादिल । ‘आःया निन्हु स्वन्हु दुने तीनकुनेतक्क क्लीयर यायगु योजना दु ।’
सापकोटां लकडाउनया इलय् सडक बेवारिसे त्वःतेबलय् सहरी सौन्दर्य हे स्यनीगु जूगुलिं यचुपिचुया ज्यायात प्राथमिकता बियागु धयादिल ।
वय्कलं न्हापांगु दिनय् हे छाँटकाँट यानागु हः, कचा, बँय् झार पुयाबलय् पिहांवःगु गुंगू ट्रिपर फोहोर टेकु छ्वयागु जानकारी बियादिल । ‘क्यबय् ज्या याइपिं पासापिन्सं जिमि प्रहरीतयत ज्या स्यनाबिल । वय्कःपिनिगु निर्देशन कथंसामाजिक दूरी कायम तसें सकसिनं ज्या यात ।’
थ्वयां न्ह्यः सहरयात हे कुरुप दयेकीगु कथं लालाःथे तयातःगु १३द्वः स्वयां आपाः तपाःगु चिपाःगु बोर्ड, ४४पाः तपाःगु होर्डिङबोर्ड चीकेधुनागु नं सापकोटां धयादिल । ‘जिमिसं ९ मिटर च्वयया सडकया दक्वं होर्डिङबोर्ड क्लीयर यानागु दु । आः चिब्यागु सडकय् दुहावने ।’
Categorized in राष्ट्रिय
