सतक विस्तारया विरोधय् अनसन न्ह्यात
लहनान्यूज | चौलाथ्व नवमी ११३७ (अप्रिल ५ २०१७)
स्वनिगलय् थीथी थासय् जुयाच्वंगु सडक विस्तारया विरोधय्उपत्यकाव्यापी सडक विस्तार पीडित संघर्ष समितिया आह्वानय् येँया रत्नपार्क लागाय् थौंनिसें रिले अनसन न्ह्याःगु दु ।
संघर्ष समितिया नायः सुमन सायमिया नेतृत्वय् रिले अनसन न्ह्याःगु खः । थौं संघर्ष समितिया न्वकू शान्तप्रकाश श्रेष्ठलिसें झिंछम्ह अनसन च्वंगु खः ।
रिले अनसन च्वने न्ह्यः आदिवासी जनजाति मानवअधिकार वकिल समुह लाहुर्निपया छ्याञ्जे शंकर लिम्बु मूपाहांया थासं अनसन च्वनीपिन्त खादां न्ययेकादीगु खः । अनसन न्ह्यःया औपचारीक ज्याझ्वलय् नवासें समितिया न्वकू श्रेष्ठं राज्यं थःपिनिगु माग पूमवंकूसा आमरण अनसन तकं च्वनेगु धयादिल ।
उगु इलय् मूपाहां लिम्बुलिसें पाहांपिं नेवाः पत्रकार राष्ट्रिय दबूया केन्द्रीय नायः श्रीकृष्ण महर्जन, अधिवक्ता टल थामी, न्वकू शान्तप्रकाश श्रेष्ठलिसें नं राज्यं गैरन्यायिक ढंगं जनताया छेँ थुनेमज्यूगु खँय् बः ब्यूगु खः ।
न्हियान्हिथं सुथसिया ८ताः इलंनिसें रिले अनसन जुइगु समितिं न्ह्यथंगु दु ।
Categorized in राष्ट्रिय
