सत्यनारायण बहादुर श्रेष्ठ जिन्दावाद
सुरजवीर बज्राचार्य
छितः छुं लुमं ला पत्रकार महासंघ बाय् तात्कालिन पत्रकार संघया स्थापनाया बारे छि अबुसत्यनारायण बहादुर श्रेष्ठनाप जूगु खँ ? जिं सत्यनारायण बहादुर श्रेष्ठया म्ह्याय् मय्जु एभिएम स्कुलया प्रधानाध्यापक सुजिता मानन्धर याके न्यना । वय्कलं जितः खास लुमं
मजू तर पत्रकार संघया संस्थापक अध्यक्ष कृष्णप्रसाद भट्टराई धकाः रेडियों धाःबलय्, चर्चाय् वःबलय् “थ्वयागु ला नां वःगु !” धकाः न्हिलाः धाःगु लुमं” धकाः कनादिल ।
सत्यनारायण बहादुर श्रेष्ठं इतिहासया छगू मूवंगु तथ्य त्वपुइगु कुतः याःगुयात नेपाःया राजनीतिक संस्कारया कारणं सामान्यकथं कयाः न्हिलाः मन बःलाकादिल जुइमा । मखुसा थःम्हं याःगु ज्याया श्रय राजनीतिक बलया हुनिं हे मेम्हसित बीगु ज्या याःगु सुनां गुकथं सह यायेफइ ।
पत्रकारितां शिक्षा क्षेत्रय् क्रियाशील जुइधुंकाः प्रसिद्ध एभिएम स्कुल (आदर्श विद्या मन्दिर) संचालनय् ब्यस्तता अप्वयेवं पत्रकारिता ख्यःया च्यूताः दतं नं इलं लाके मफुत जुइ । सत्यनारायण बहादुर श्रेष्ठं न्हिला सामान्य तरिकां काःगु तथ्य आःतक नं सरकारं हुइमफुनि तर हुइगु कुतः निरन्तर यानाच्वंगु दनि ।
पत्रकारतय्त संगठित यायेगु तातुनां नेपालय् दकले न्हापां २००८ सालय् सत्यनारायण बहादुर श्रेष्ठं नेपाल पत्रकार संघ स्वनादिल । थुकिया सेक्रेटरी भोजबहादुर सिँह न्यौपाने खः । ग्रीष्मबहादुर देवकोटाया ‘नेपालको छापाखाना र पत्र–पत्रिकाको इतिहास’ सफुतिइ पत्रकारिता ब्वमिपिन्सं निरन्तर ब्वनाः वयाच्वंगु तथ्य खः थ्व । अनंलि २००९ साल वैशाख २८ गते आर्य समाज मन्दिर, भोताहितिइ जूगु थुगु संघया निक्वःगु सभां हाकनं नेपाल टुडेया सम्पादक सत्यनारायणबहादुर श्रेष्ठयात हे नायः ल्यल ।
उपसभापति श्री प्रेमराज शर्मा (सं, गोरखापत्र), सेक्रेटरी भोजबहादुर सिँह न्यौपाने, (सं, तरंग), ज्वाइन्ट सेक्रेटरी रामहरि जोशी, (सं, नेपाल पुकार), कोषाध्यक्ष रामराज शर्मा, (नेपाल पुकार) व सदस्य नारायणप्रसाद उपाध्याय, देवेन्द्रराज शर्मा, भीमभक्त जोशी, प्रकाशचन्द्र टण्डन दुथ्याःगु कार्यकारिणी समिति दयेकूगु खः । थुगु संघं नेपाःया पत्रकार व नेपाः पिने च्वंपि नेपाली पत्रकारपिन्त संगठित यानाः माःगु सुविधाया लागि कुतः यायेगु व नेपालपिनेया पत्रकारपिंनाप सम्बन्ध स्थापित यानाः श्रमजीवी पत्रकार व समाचारपत्रया अधिकार रक्षा यायेगु तातुनां न्ह्याःगु खःसासंचार ख्यःया अस्पष्टता, सरकारं संचार ख्यलय् हस्तक्षेप यायेफुगु कानूनया विषय नं खँ ल्ह्वंगु दु ।
२००८ सालय् सत्यनारायण बहादुर श्रेष्ठं स्थापना जूगु थुगु तथ्य अस्वीकार याये सुनां मफु । अय्नं थ्व तथ्य हुइगु ज्याय् बल बियाच्वंपिं राजनीतिज्ञतनापं पत्रकारत नं उत्तिकं दुगु दुःखया खँ खः । नेपाली काँग्रेसया संस्थापक जूगु हुनिं नं काँग्रेस समर्थिक पत्रकारतय्सं कित्ताकाट जुइकः हे सही तथ्ययात त्वःपुयाः कृष्णप्रसाद भट्टराई जुइमाः धकाः सः तःगु नं थुगु इलय् लुमंकेफइ ।
सुर्य थापां च्वःगु छपु च्वसुइ “ग्रीष्मबहादुर देवकोटां च्वःगु “नेपालको छापाखाना र पत्रपत्रिकाया इतिहास” नांगु सफुतिइ थ्यमथ्यं १२ पाना नेपाल पत्रकार महासंघया गठनया बारे च्वयातःगु दु । सफुतिइ प्रष्ट च्वयातःगु दु कि नेपाल पत्रकार संघया स्थापना २००८ सालय् जूगु खः । थुकिया संस्थापक अध्यक्ष सत्यनारायण बहादुर श्रेष्ठ हे खः । नकतिनि पत्रकार प्रकृति अधिकारीं सार्वजनिक याःगु गोरखापत्रय् प्रकाशित जूगु उबलेया पत्रकार संघया गतिविधिइ २००९ सालय् छापेजूगु समाचारय् नं नेपाल पत्रकार महासंघया स्थापना २००८ सालय् जूगु च्वयातःगुलिं अझ प्रष्ट जू ।
०५७÷०५८ सालपाखे महासंघया तत्कालिन नेतृत्व कृष्णप्रसाद भट्टराई प्रधानमन्त्री जूगु मौकाय् सहासंघया अध्यक्ष धकाः वय्कःयात न्ह्यब्वल । इतिहास अध्ययन मयाःसे न्ह्यब्वःगु जुयाः थुगु विषय वहस जुल । महासंघया इतिहासया थ्व तथ्य व वास्तविकता थुइकाः निर्विवाद इतिहास च्वयेगु ज्या न्ह्याकेमाः । गोविन्द आचार्यया नेतृत्वं महासंघया ४ दँ क्वपालेगु ज्या याइ बाहे इसिहासया सही तथ्ययात सम्मान याइ ? थ्व स्वये ल्यंदनि ।”
नेपाल पत्रकार महासंघया निवर्तमान नायः डा. महेन्द्र विष्टं थःगु विद्यावारिधीया थेसिसय् “श्रेष्ठं हे संघ नीस्वंगु खँ च्वयागु दु धकाः कनादीगु खः” थुगु विषयय् चर्चा जूबलय् । अय्नं वय्कःया कार्यकालय् सत्यनारायण बहादु श्रेष्ठयात संस्थापककथं घोषणा व थुगु नांनाप स्वाःगु कर्म स्वनादीमफुत । अझ पत्रकार महासंघया महाधिवेशनय् संस्थापक कथं कृष्णप्रसाद भट्टराईया नामं सिरपा बीगु ज्या जुल ।
थुकी नं नेवाः पत्रकार राष्ट्रिय दबूया ध्यानाकर्षण जूगु खःसा दबूया यल कचां यलय् छगू बिचाःमुँज्याया ग्वसाः नं ग्वःगु खः गुकिइ महासंघया उबलेया वmेन्द्रीय दुजः लक्की चौधरी झायादीगु खः गुम्हसिनं सत्यनारायण बहादुर श्रेष्ठया नां व ज्याया वेवास्ता जूगु विरोधय् च्वयेगु, न्वंवायेगु यानाच्वनादीगु दुसा वय्कःलिसें संस्थापक नायः श्रेष्ठया म्ह्याय् सुजिता मानन्धरं वय्कःयाबारे कनादीगु खः ।
अलमल हे मजुइमाःगु नां व कर्म अलमलय् लाकाः हुइगु कुतः छथ्वः पत्रकारया मागकथं सरकारं कृष्णप्रसाद भट्टराईया ना स्वाकाः ‘राष्ट्रिय आम सञ्चार प्रतिष्ठान’ नीस्वनाः यायेगु कुतः यात । उबलेसञ्चारमन्त्रीडा. मीनेन्द्र रिजाल जुयाच्वनादीगु । थुकिया ब्यापक विरोध जुल । विरोधया हुनिं नां लिकात । लिकाबलय् काँग्रेस समर्थिक पत्रकारत छथ्वःया सः हाकनं तःसः जुल ।
राजनीतिक संस्कारं ब्यूगु तथ्य त्वपुइगु आँट तसकं दुःखद खःथुगु अवस्था हाकनं खनेदत । आः थ्व इलय् नं थ्व चर्चा जायावःगु दु । हाकनं कृष्णप्रसाद भट्टराईयात संस्थापक नायःकथं स्वनेगु कुतः जूगुलिंं नेवाः पत्रकार राष्ट्रिय दबुलिं थ्व गलत ज्याय् ध्यानाकर्षण याकूसें विज्ञप्ति नं पिथंगु दु ।
दबुलिं निक्वःगु महाअधिवेशनया उद्घाटन सत्रय्सत्यनारायण बहादुर श्रेष्ठया योगदानया कदर यासें पत्रकार दबूपाखें सम्मान पत्र देछायेगु ज्या जूगु खः । उबलेया संचारमन्त्री शेरधनराईपाखें देछायेगु ज्या जूगु थुगु हनापौ देछायेगु ज्या जुयाच्वंगु इलय् नेपाल पत्रकार महासंघया निवर्तमान अध्यक्ष महेन्द्र विष्ट नं दबुलिइ च्वनादीगु खः । सत्यनारायण बहादुर श्रेष्ठया नामय् द्यछाःगु थुगु हनापौ वय्कःया म्ह्याय् सुजिता मानन्धरं लःल्हानाकयादीगु खः ।
पत्रकार दबुलिं २००८ सालय् नेपाल पत्रकार संघया स्थापना जूगु व स्थापना यानादीम्ह संस्थापक नायः सत्यनारायण बहादुर श्रेष्ठया ज्या व योगदान हुइगु कुतः गलत खः धाःगु दु । थुकिया गलत ज्याया विरोध याःगु दु । विरोधया वेवास्ता जुल धाःसा आन्दोलनया नितिं नेवाः पत्रकारतय्त तयारी अवस्थाय् च्वनेतः नं धाःगु दुसा नेवाः काय्मचा सत्यनारायण बहादुर श्रेष्ठया नां व ज्या हुइगु थुगु सरकारया कुतः पनेत नेवाः समाजयात नं आव्हान याःगु दु ।
पत्रकार दबुलिं तइगु सलय् नेवाः समाजया नं सः दुथ्याइगु विश्वास नेवाः पत्रकारतय्गु राष्ट्रिय संगठन नेवाः पत्रकार राष्ट्रिय दबुलिं काःगु दु ।
