सप्तरी घटना विरुद्ध येँय् विरोध सभा
नृपेन्द्रलाल श्रेष्ठ | चिल्लाथ्व द्वादशी ११३७ (मार्च ९ २०१७)
सप्तरीइ प्रहरीं गोलिं कयेकाः प्यम्ह स्यानाब्युगु विरोधय् थौं संघीय गठबन्धनं विरोध सभा याःगु दु ।
येँया माइतीघर मण्डलाय् जूगु सभाय् संघीय समाजवादि फोरम नेपालया नायः उपेन्द्र यादव, ल्यू नायः राजेन्द्र श्रेष्ठ, वरिष्ठ नेता अशोक राई, नेपाः राष्ट्रिय पार्टिया मू छ्यान्जे विजय सैंजु, नेवाः न्ह्यलुवाः डा. महेशमान श्रेष्ठलिसेंया ब्वति दुगु खः ।
सभाय् नवाःपिन्सं राज्यं योजनावद्ध रुपं हे सप्तरी घटना याकूगु द्वपं ब्यूगु खः । मधेस लिसें मुक्कं आदिवासी जनजातियात समान अधिकार मब्यूतल्ले थःपिनिगु आन्दोलन न्ह्यानाच्वनीगु धाःगु खः ।
व स्वयां न्ह्यः भृकुटीमण्डपं पिहांवःगु र्यालीं थीथी थाय् चाःहिलाः माइतीघर मण्डला थ्यंकाः सभाय् ह्यूगु खः ।
उकिया लिसें नेवाः राजनीति अभियान, नेवाः ग्वाहालि गुथि, नेवाः देय् गुथि नेपालमण्डल, संघीय समाजवादी नेवाः संघलिसेंया संस्थां असनं जुलुुुस पिकयाः भृकुटिमण्डपया र्यालीइ दुथ्याःवंगु खः ।
