२०८० चैत्र १६, शुक्रबार

समाजवादी पार्टी निर्वाचन आयोगय् दर्ता जुल

लहना न्यूज | ने.सं. ११३९ गुंलाथ्व पारु (२ अगष्ट, २०१९), शुक्रवाः

उपेन्द्र यादव नेतृत्वया संघीय समाजवादी पार्टी र डा. बाबुराम भट्टराई नेतृत्वया नयाँ शक्ति पार्टी मिले जुयाः दयेकूगु समावजादी पार्टी निर्वाचन आयोगय् दर्ता जूगु दु ।
 
आयोगया प्रवक्ता शंकर प्रसाद खरेलं थौं शुक्रवाः च्वंगु आयोगया मुँज्यां उगु दल दर्ताया निर्णय याःगु धयादीगु दु । दल दर्ताया नितिं उगु पार्टीं जेष्ठ ३० गते निर्वाचन आयोगय् निवेदन दर्ता याःगु खः ।
 
पार्टीया नायः उपेन्द्र यादव नापं पार्टीया संघीय परिषदया नायः डा. बाबुराम भट्टराईं आयोगय् वनाः दल दर्ताया नितिं निवेदन बियादीगु खः ।
 
संघीयताया पूवंक कार्यान्वयन यानाः देशयात सुशासन व समृद्धिया लँपुपाखें न्ह्यज्यासें समाजवादतक थ्यंकेगु लक्षलिसें तत्कालीन यादव नेतृत्वया संघीय समाजवादी फोरम, नेपाल व डा. भट्टराई नेतृत्वया नयाँ शत्तिः पार्टी, नेपाः दुथइ एकीकरण जुइधुंकाः वंगु बैशाख २३ गते समाजवादी पार्टी, नेपाल घोषणा याःगु खः ।
 
दल दर्ताया नितिं उगु पार्टीं समाजवादी पार्टी नेपाल हे प्रस्ताव याःसां नं निर्वाचन आयोगय् उगु नांया पार्टी दर्ता दुगुलिं समाजवादी पार्टी जक जूगु पार्टीया महासचिव रामसहाय यादवं जानकारी बियादिल ।
 
पार्टीया ध्वाँय्या खँय् तत्कालीन संघीय समाजवादी पार्टीया हे जुइगु सहमति जूसां नं चुनाव चिंयात कयाः धाःसा क्वःज्यूगु मदुनि ।
Categorized in राजनीति