समाजसेवी निर्मलरत्न तुलाधर मन्त
लहनान्यूज सम्वाददाता | कछलागा त्रयोदशि ११३७ (नोभम्बर २७ २०१६)
समाजसेवी, भाषासेवीलिसें लहना वाःपौया ग्वाहालिमि भाजु निर्मलरत्न तुलाधर मन्त ।
ब्लड क्यान्सर ल्वचं कयाच्वंम्ह भाजु तुलाधर थौं सुथय् बालाजुइ थःगु हे छेँय् आकाझाकां मदुगु खः । मदुम्ह तुलाधर लछि न्ह्यःनिसें ब्लड क्यान्सरया वासः याकाच्वनादीगु खःसा वयकः भारतया न्हू दिल्लीया मेदान्त अस्पतालय् नं उपचारया नितिं झाःगु खः ।
वयकःया अन्त्येष्टि थौं हे क्वचाःगु दु । मदुम्हेसित तःधिकःम्ह म्ह्याय् न्यूली तुलाधरं मि तयादिल ।
मदुम्ह तुलाधरया परिवारय् जहान व स्वम्ह म्ह्यायपिं दी ।
मदुम्ह तुलाधर बिनायक बस्ति टोल सुधार गुथि बालाजुया संस्थापक सचिव, सिन्धुली सिद्धबाबा मन्दिर जिर्णोद्धारया संस्थापक नायः, लायन्स क्लब अफ रिङरोडया संस्थापक नायः, न्यागःमणि जिर्णोद्धार कमितिया संस्थापक नायः, चःमति जग्गा एकिकरण आयोजनाया कजि, उदाय् समाजया ग्वसालय् सछिगः धाः बाजं (गुंला बाजं) ब्वज्याया कजि जुयाः सामाजिक ज्याय् सक्रिय जुयादीगु दुगु खः । लिसें वयकः छम्ह रेकि हिलर नं खः ।
बिनायक क्यान्डल हाउसया नामं मैनमतया ब्यवसाय नं याना वयाच्वनादीम्ह वयकलं थःगु मैनमत उद्योगपाखें गुलिखे नेवाः ज्याझ्वःया दबू छायेपीत ग्वाहालि यानादीगु दुगु खः ।
Categorized in राष्ट्रिय
