समृद्धिया म्हगस
जुजुमान महर्जन
 
 
प्रतिनिधिसभा व प्रदेशसभाय् तत्कालीन नेकपा एमाले व नेकपा माओवादी केन्द्रपाखें बहुमत प्राप्त याय्धुंकाः देशयात आर्थिक समृद्धि व विकासया नारा थ्वय्का वयाच्वंगु खः । थ्व नारायात अझ सशक्तढंगं वर्तमान सरकारया प्रधानमन्त्री केपी शर्मा ओलीं न्ह्यःने यंकूगु दु ।
 
अले न्ह्याथाय् नं रेल, मोनोरेललिसें पानी जहाजया खँ ल्ह्वनाः देशयात समृद्धिया दिशाय् यंकेगु खँ ल्हाना वयाच्वंगु दु । अझ झीगु जःलाखःला देय् चीनया खुन्हुया भ्रमणय् नेपालय् रेल थ्यंकेगुकथंया सम्झौता व समझदारी याःगु दु । थ्व लिपा ला नेपाःया समृद्धि पूवनीगुकथंया चर्चा यानाजूगु दु ।
 
नेपालय् तत्काल रेलया आवश्यकता खः वा नेपाःमितय्गु जनजीवनयात लिच्वः लाकाच्वंगु मेमेगु खँत गथेकि आधारभूत आवश्यकतात गुगु बजाः भाः, नय्त्वनेगु खँ, लः, व्यापार घाटालिसेंया खँयात कयाः गबलें नं चर्चा याःगु खनेमदु । थौंकन्हय् धाय्गु खःसा नेपालय् लँया अवस्थायात कयाः जुयाच्वंगु सुधार तसकं हे सुस्त गतिं जक मखु, वपाखें मनूया जनजीवनय् लानाच्वंगु लिच्वः, अस्वस्थ नसाज्वलंया विक्रि वितरण, गुणस्तरयात आदियात कयाः गबलें हे च्यूताः क्यनाच्वंगु मदु । अझ येँ धाय्गु खःसा त्वःनेगु लःया हाहाकार जुयाच्वंगु दु, तर थुकियात सम्बोधन याय्गु नितिं मेलम्ची प्रोजेक्ट वःगु ताःई दय्धुंकल, तर आःतक नं ताःलाकेगु खँय् धाःसा गबलें नं न्ह्यच्यूगु खनेमदु । 
 
जनताया आधारभूत आवश्यकताया खँ ल्हाय्गु खःसा नेपालय् दक्वसितं माःगु धइगु शिक्षा व स्वास्थ्य खः । गुगु विश्वया हे दकलय् थिकेगु शिक्षा सायद नेपालय् हे जुइ । देश विकासया नितिं स्वस्थ जनशक्तिया नितिं स्वास्थ्य क्षेत्र फुक्क जनतातय्गु पहुँच सर्वसुलभ जुइमाःगु खः, तर थनया जनतातय्सं थःम्हेस्यां जीवंकाःछि मुंकातःगु धेबा थुकी हे फुकाच्वनेमाःगु अवस्था दु । उलि जक मखु, शिक्षायु जनतातय्गु पहुँच नं उकथं हे दु । 
 
जनताया स्वास्थ्यया खँ ल्हाय्बलय् नसाज्वलंया शुद्धताया खँ वइ । तर झीगु देशय् नसाज्वलं गुलि शुद्ध जू धइगु छुं दिं न्ह्यः जूगु अनुगमनपाखें नं उलाब्यूगु दु । जनतायात मदय्क मगाःगु दुरुइ तकं युरिया व सोडा ल्वाकछ्यानातःगु लूगु खः ।
 
व नं छगू निगू कम्पनीइ जक मखु, अधिकांश दुरुया कम्पनीइ थुकथंया हर्कत जुयाच्वंगु दु । मेमेगु नसाज्वलनय् विषादीत ल्वाकछ्यानातइगु खँ ला न्ह्याक्व ल्हाःसां क्वचाइमखु । तर थजाःगु सम्वेदनशील खँयात कयाः सरकारी निकायपाखें गुगु अनुगमन अले कारवाही लिसें सजाँय याय्माःगु खः, व धाःसा गबलें हे जूगु खनेमदु । थजाःगु अवस्थाय् जनताया स्वास्थ्य लिसें जनजीवनयात खेलाँचि यानाः देश समृद्ध गथे यानाः जुइ ?
 
अझ देशय् थौंकन्हय् जनतायात करं क्वत्यलातःगु दु । न्ह्याग्गु खँय् नं करया दायराय् हयाः जनतायात आतंकित याःगु खनेदु । कर काय्गु धइगु देश समृद्धिया नितिं छगू पलाः जुइफु, तर कर म्हय्धुंकाः लाभग्राहीतय्त छुं नं कथंया सेवा मबीगु, सुरक्षा मदइगु खःसा वा थःम्हेस्यां पूगु करपाखें जुइगु अनुभव याय् मदइगु खःसा जनतातय्सं करयात गबलें नं सकारात्मककथं नाला काय्फइमखु । थजाःगु खँय् ध्यान बीगु थौंया आवश्यकता खः । थुकिया अर्थ देशय् रेल वा मोनो रेल म्वाःगु धइगु मखु, तर जनताया प्राथमिकतायात म्हसीकाः ज्या याःसा जक सरकार ताःलाइगु खः, देश समृद्धिपाखे न्ह्याःवनीगु खः ।