सम्पदा मैत्री फल्चाया पुनःनिर्माण जुल
येँ महानगरपालिका–१२या ब्रह्मत्वालय् मौलिक परम्परा व कलात्मक शैलीइ सम्पदा मैत्रीकथं श्वेत भैरब फल्चा पुनःनिर्माण याःगु दु ।
 
छगू ज्याझ्वःया दथुइ उगु फल्चाया उलेज्या यानादिसें बागमती प्रदेशया सभासद डा. अजयक्रान्ति शाक्यं बागमती प्रदेश सरकारया स्थानीय पूर्वाधार विकास साझेदारी ज्याझ्वःकथं फल्चाया पुनःनिर्माण यानागु धयादिल । वय्कलं पुरातात्विक सम्पदां जाःगु येँ देसय् दुगु कला, संस्कृति, मूर्त–अमूर्त सम्पदाया संरक्षण याय्माः धइगु सन्देश बियागु नं धयादिल ।
 
ज्याझ्वलय् येँ महानगरपालिका–१२या वडाध्यक्ष विकास डंगोलं दँय्दसं मोहनि नखःया पञ्चमि अर्थात पचिमह्रः कुन्हु जुइगु पचलि भैरया जात्रा व झिंनिदँय् छक्वः जुइगु पचलि भैरव जात्रा अन्तर्गत जुइगु गथु प्याखंया हुनिं थुगु थाय्या विशेष महत्व दुगु धयादिल ।