थीथी चिनी मिलयात तु मिइगु यानावःपिं च्यागू जिल्लाया किसानतय्त सरकारं ७६गू कोती ६१गू लख ४२द्व निसः व ९४तका भुक्तानी याःगु दु ।

वंगु दँ सञ्चालनय् वःगु १०गू चिनी उद्योगतय्सं छगू कोती १९गू लख ४०द्व क्विन्टल तु क्रसिङ याःगु खः । तु क्रसिङ याःगु चिनी उद्योगपाखें चूलाःगु धलःया लिधंसाय् किसानतय्गु खाताय् सरकारं अनुदान कथं चूलाकूगु भुक्तानी बीगु प्रतिक्विन्टल ६५गू फुती २०गःया दरं ध्यबा मुंकूगु कृषि तथा पशुपंक्षी विकास मन्त्रालयया प्रवक्ता प्रकाश सञ्जेलं जानकारी बियादिल ।

कोष तथा लेखा नियन्त्रण ज्याकुथी छ्वःगु ध्यबा मध्ये ७६गू कोती ६१गू लख ४२द्व निसः व ९४तका जक किसानतय्गु खाताय् छ्वःगु दु । ल्यंदुगु ध्यबा कोष तथा लेखा नियन्त्रण ज्याकुथी हे दु । वंगु दँया तु क्रसिङ याःपिं किसानतय्गु त्वःफ्यूगु धलः वयाःच्वंगुलिं थप ध्यबा किसानतय्गु खाताय् छ्वइगु मन्त्रालयं धागु दु ।

वंगु दँ तु किसानतय्त अनुदान बीत विनियोजन यानातःगु बजेटपाखें ६गू कोती  मल्याक बचत जुइगु खनेदु । निदँनिसें तु किसानतय्गु खाताय् सरकारं अनुदानबापतया ध्यबा छ्वयाच्वंगु दु ।

थ्वसिवे न्ह्यः सम्बन्धित उद्योगया खाताय् सरकारं अनुदानया ध्यबा छ्वयेगु यानावःगु खः । उद्योगीतय्सं किसानतय्गु खाताय् तु क्रसिङ याःगु परिमाणया लिधंसाय् छ्वयाबीगु व्यवस्था दुगु खः । तर, यक्व धइथें उद्योगीतय्सं किसानतय्त ध्यबा मब्यूसें अनियमितता यायेवं सरकारं हे किसानतय्गु खाताय् ध्यबा छ्वःगु खः ।

थुगुसिइ न सरकारं तु उत्पादन याइपिं किसानतय्त ७०तका प्रतिक्विन्टल सरकारी अनुदान चूलाकेगु यानाः समर्थन मूल्य प्रतिक्विन्टल न्यासः व ९०गः क्वःछ्यूगु दु । कृषि मन्त्रालयया प्रवक्ता सञ्जेलं थुगुसिया तुु क्रसिङ क्वचायेवं चिनी उद्योग जुसें जिल्ला प्रशासन ज्याकूपाखें धलः चूलाइ ।

थ्वहे लिधंसाय् किसानतय्त इनीगु अनुदान ध्यबाया लिच्वः पिहाँवइ । सरकारी अनुदान कायेत कृषि मन्त्रालयं देय्न्यंकंया तु किसानतय्त थःथःगु स्थानीय तहलय् विवरण लःल्हायेत सार्वजनिक सूचना ब्यूगु दु ।

Categorized in राष्ट्रिय